काठमाडौँ । राष्ट्रिय अनलाइन पत्रकार संघ (National Online Journalist Association–NOJA) को १२औँ वार्षिकोत्सव तथा ‘१२औँ राष्ट्रिय नोजा सम्मान पुरस्कार २०८३’ भव्य समारोहबीच सम्पन्न भएको छ।

चेम्बर अफ कमर्सका अध्यक्ष कमलेश अग्रवालको प्रमुख आतिथ्यता तथा राष्ट्रिय अनलाइन पत्रकार संघका अध्यक्ष मुकुन्द ढुंगानाको सभाध्यक्षतामा सम्पन्न समारोहमा शिक्षा, स्वास्थ्य, सामाजिक सेवा, व्यवसाय, पत्रकारिता, सञ्चार, कला, साहित्यलगायत विभिन्न २५ क्षेत्रका क्षेत्रमा उल्लेखनीय योगदान पुर्‍याएका व्यक्तित्वहरूलाई ‘नेसनल नोजा अनर अवार्ड २०८३’ प्रदान गरी सम्मान गरिएको थियो।

समारोहमा विभिन्न क्षेत्रका विशिष्ट व्यक्तित्व, पत्रकार, सञ्चारकर्मी, व्यवसायी, सामाजिक अभियन्ता, शिक्षाविद्, कलाकार तथा संघ–संस्थाका प्रतिनिधिहरूको उल्लेख्य सहभागिता रहेको थियो।

कार्यक्रममा यस वर्षको विशेष ‘नोजा पत्रकारिता सम्मान तथा पुरस्कार’ नगद रु. ११ हजार १११ सहित पत्रकार देवकोटालाई प्रदान गरिएको छ। पत्रकारिता क्षेत्रमा निरन्तर योगदान, सक्रियता र व्यावसायिक भूमिकाको उच्च मूल्याङ्कन गर्दै उक्त सम्मान प्रदान गरिएको नोजाले जनाएको छ।

डिजिटल पत्रकारितालाई मर्यादित र सबल बनाउनुपर्छ : मुकुन्द ढुंगाना

कार्यक्रमका सभाध्यक्ष तथा नोजाका अध्यक्ष मुकुन्द ढुंगानाले डिजिटल पत्रकारिताको प्रभाव र पहुँच तीव्र रूपमा बढिरहेको अवस्थामा पत्रकारिताको विश्वसनीयता, मर्यादा र व्यावसायिकता कायम राख्नु सबैको साझा जिम्मेवारी भएको बताए।

ढुंगानाले प्रविधिको तीव्र विकाससँगै पत्रकारिताको स्वरूप परिवर्तन भइरहेको उल्लेख गर्दै प्रविधि र आर्टिफिसियल इन्टेलिजेन्स (AI) को सही प्रयोगमार्फत पत्रकारितालाई थप प्रभावकारी बनाउनुपर्नेमा जोड दिए।

“आजको पत्रकारिता डिजिटल प्रविधि र AI सँग जोडिएको छ। प्रविधिको प्रयोग आवश्यक छ, तर पत्रकारिताको मूल आधार तथ्य, सत्य, निष्पक्षता र जिम्मेवारी हो। प्रविधि परिवर्तन भए पनि पत्रकारिताको मूल्य र विश्वसनीयता कमजोर हुनु हुँदैन,” अध्यक्ष ढुंगानाले भने।

उनले नोजाले स्थापनाकालदेखि नै अनलाइन पत्रकारिता क्षेत्रको व्यावसायिक विकास, पत्रकारहरूको हकहित, क्षमता अभिवृद्धि तथा जिम्मेवार पत्रकारिताको प्रवर्द्धनमा काम गर्दै आएको बताए।

“‘बलियो, सुसूचित र प्रगतिशील मिडियाका लागि ऐक्यबद्धता’ भन्ने मूल नारासहित नोजा अघि बढिरहेको छ। आज २५ वटा विभिन्न क्षेत्रमा योगदान पुर्‍याउने व्यक्तित्वलाई सम्मान गर्नु पनि समाजका सकारात्मक योगदानलाई प्रोत्साहित गर्ने हाम्रो अभियानको निरन्तरता हो,” उनले भने।

समाजका विभिन्न क्षेत्रमा योगदान पुर्‍याउने व्यक्तित्व सम्मानित

नोजाको १२औँ वार्षिकोत्सवको अवसरमा आयोजित सम्मान समारोहमा शिक्षा, स्वास्थ्य, सामाजिक सेवा, व्यवसाय, पत्रकारिता तथा सञ्चार, कला, साहित्यलगायत २५ क्षेत्रका व्यक्तित्वलाई सम्मान गरिएको थियो।

नोजाले पत्रकारिता र सञ्चार क्षेत्रसँगै समाज निर्माणमा योगदान पुर्‍याउने अन्य क्षेत्रका व्यक्तित्वलाई समेत सम्मान गर्दै आएको जनाएको छ। समाजका विभिन्न क्षेत्रमा योगदान पुर्‍याउने व्यक्तिहरूलाई एउटै मञ्चमा सम्मान गर्नु कार्यक्रमको विशेष पक्ष बनेको थियो।

सम्मानित व्यक्तित्वहरूले नोजाले आफ्नो योगदानको मूल्याङ्कन गर्दै सम्मान गरेकोमा आभार व्यक्त गर्दै आगामी दिनमा आ–आफ्नो क्षेत्रमा थप जिम्मेवारीका साथ काम गर्ने प्रतिबद्धता व्यक्त गरेका थिए।

कमलेश अग्रवाल : सञ्चार र समाजबीच सहकार्य आवश्यक

समारोहका प्रमुख अतिथि चेम्बर अफ कमर्सका अध्यक्ष कमलेश अग्रवालले सञ्चार क्षेत्र समाजको ऐना भएको उल्लेख गर्दै आर्थिक, सामाजिक र राष्ट्रिय विकासका लागि सञ्चारमाध्यमको भूमिका महत्वपूर्ण रहेको बताए।

अग्रवालले पत्रकारिताले समाजका सकारात्मक गतिविधिलाई उजागर गर्नुका साथै गलत प्रवृत्तिमाथि खबरदारी गर्ने भएकाले जिम्मेवार र व्यावसायिक पत्रकारिताको आवश्यकता अझ बढेको बताए।

उनले डिजिटल सञ्चारमाध्यमको विस्तारसँगै सत्य र तथ्यमा आधारित सूचना सम्प्रेषणलाई प्राथमिकता दिनुपर्ने उल्लेख गर्दै पत्रकारिता, व्यवसाय र सामाजिक क्षेत्रबीच सहकार्य आवश्यक रहेको धारणा व्यक्त गरे।

१२ वर्षको यात्रापछि नयाँ जिम्मेवारी

राष्ट्रिय अनलाइन पत्रकार संघले १२ वर्षको संस्थागत यात्राका क्रममा अनलाइन तथा डिजिटल पत्रकारिताको विकास, पत्रकारहरूको क्षमता अभिवृद्धि, हकहित र जिम्मेवार पत्रकारिताको प्रवर्द्धनका लागि विभिन्न गतिविधि गर्दै आएको छ।

संघले डिजिटल पत्रकारिताको बदलिँदो स्वरूपसँगै AI, डेटा पत्रकारिता, साइबर सुरक्षा, डिजिटल प्रविधि तथा पत्रकारहरूको व्यावसायिक क्षमता विकासलाई आगामी दिनमा प्राथमिकतामा राख्ने जनाएको छ।

१२औँ वार्षिकोत्सव तथा राष्ट्रिय नोजा सम्मान समारोहले पत्रकारिता मात्र नभई शिक्षा, स्वास्थ्य, सामाजिक सेवा, व्यवसाय, कला, साहित्यलगायत समाजका विभिन्न क्षेत्रमा योगदान पुर्‍याउने व्यक्तित्वलाई एउटै मञ्चमा जोड्दै सहकार्य र सम्मानको सन्देश दिएको नोजाले जनाएको छ।

समारोहले ‘बलियो, सुसूचित र प्रगतिशील मिडियाका लागि ऐक्यबद्धता’ भन्ने नारालाई थप सशक्त बनाउँदै मर्यादित, सबल र विश्वसनीय डिजिटल पत्रकारिताको यात्रालाई निरन्तरता दिने प्रतिबद्धता समेत व्यक्त गरेको छ।