मनाङ। मनाङको नार्पाभूमि गाउँपालिका–५ स्थित हिम्लुङ हिमालमा आइतबार गएको हिमपहिरोमा परी मृत्यु हुनेको संख्या सात पुगेको छ। हिमपहिरोमा परी बेपत्ता भएका थप तीनजनाको शव बिहीबार फेला परेसँगै मृतकको संख्या सात पुगेको हो।

यसअघि आइतबार दुईजना र सोमबार थप दुईजनाको शव फेला परेको थियो। बिहीबार हिम्लुङ हिमालको पाँच हजार दुई सय मिटर उचाइमा रहेको आधार शिविर आसपासको क्षेत्रमा हिउँले पुरिएको अवस्थामा थप तीनजनाको शव फेला परेको हो।

प्रदेश प्रहरी कार्यालय गण्डकीका सूचना अधिकारी प्रहरी वरिष्ठ उपरीक्षक कृष्णप्रसाद कोइरालाका अनुसार बिहीबार रुकुमको हुकाम–७ का ५७ वर्षीय कलम बुढा, खोटाङको ऐंसेलुखर्क–९ का २१ वर्षीय सुरज राई र गोरखाको केरौँजा–१ का ५८ वर्षीय आस गुरुङको शव फेला परेको हो।

बेपत्ताहरूको खोजीमा परिचालन गरिएको एभरेस्ट एयरको हेलिकोप्टरमार्फत उनीहरूको शव प्रदेश अस्पताल चामे ल्याइएको छ।

मनाङका सहायक प्रमुख जिल्ला अधिकारी कृष्णप्रसाद पौडेलका अनुसार हिमालयन होलिडे कम्पनीमार्फत २१ जना र इक्पिडिसन इमाजिन कम्पनीमार्फत ६ जना गरी २७ जना हिम्लुङ हिमालको आधार शिविरमा क्याम्प सेटअप गर्नका लागि असोज २ गते काठमाडौंँबाट गएका थिए।

तीमध्ये हालसम्म ११ जना सम्पर्कमा आएका छन् भने नौजना अझै सम्पर्कविहीन रहेको प्रशासनले जनाएको छ। बेपत्ताहरूको खोजी तथा उद्धार कार्य जारी रहेको छ।