काठमाडौं । कुनै समय नेपालको धादिङ जिल्लाको त्रिपुरासुन्दरी गाउँमा आफ्ना सपनाहरू बोकेर हुर्किएका एक युवा आज विश्वकै प्रतिष्ठित पाँचतारे होटलहरूको भान्सामा नेतृत्व गरिरहेका छन्। यो कथा हो नेपाली प्रतिभा, अथक संघर्ष, अटल आत्मविश्वास र मातृभूमिप्रतिको गहिरो प्रेम बोकेका एक्जिक्युटिभ पेस्ट्री सेफ सरोज थापाको, जसले आफ्नो सीप र समर्पणका माध्यमबाट नेपालको नाम अन्तर्राष्ट्रिय हस्पिटालिटी उद्योगमा गर्वका साथ स्थापित गरेका छन्।

सामान्य परिवारमा जन्मिएका सरोज थापाको सफलता कुनै संयोग होइन। यो हजारौँ दिनको कठिन परिश्रम, निरन्तर सिकाइ, अनुशासन र कहिल्यै हार नमान्ने आत्मविश्वासको परिणाम हो। दाजु रणबहादुर थापाको साथमा सामान्य कामदारका रूपमा अबुधाबीबाट विदेश यात्रा सुरु गरेका उनले आज मध्यपूर्व, युरोप र अफ्रिकाका प्रतिष्ठित लक्जरी होटलहरूमा आफ्नो छुट्टै पहिचान बनाउन सफल भएका छन्।

आज उनी साउदी अरेबियाको महत्वाकांक्षी पर्यटन परियोजनाअन्तर्गत सञ्चालित ग्रान्ड ह्यात द रेड सीमा प्रि–ओपनिङ एक्जिक्युटिभ पेस्ट्री सेफका रूपमा कार्यरत छन्। यस पदसम्म पुग्नु कुनै सामान्य उपलब्धि होइन, बरु विश्वस्तरीय दक्षता, नेतृत्व क्षमता र अन्तर्राष्ट्रिय विश्वासको प्रतीक हो।

सरोज थापाले आफ्नो करियरको सुरुवात अत्यन्तै साधारण अवस्थाबाट गरेका थिए। सुरुका दिनहरू चुनौतीपूर्ण थिए। भाषा, संस्कृति, कामको दबाब र विदेशी भूमिको कठिनाइसँग जुध्दै उनले आफ्नो लक्ष्य कहिल्यै छोडेनन्।

युएई, कतार, ओमान, कुवेत, बहराइन, फ्रान्स, जर्मनी र अफ्रिकाको कङ्गोसम्म फैलिएको उनको व्यावसायिक यात्राले उनलाई अन्तर्राष्ट्रिय स्तरको अनुभवी सेफ बनाएको छ। हरेक देशले उनलाई नयाँ अनुभव दियो, हरेक चुनौतीले अझ बलियो बनायो, र हरेक सफलताले नेपालको झण्डा विश्वमञ्चमा अझ उचो बनाइदियो।

सेफ सरोज थापाको करियरको सबैभन्दा चर्चित उपलब्धिमध्ये एक हो कुवेतमा आयोजित प्रतिष्ठित होरेका वेडिङ केक प्रतियोगिता, विश्वका विभिन्न देशका १४५ उत्कृष्ट प्रतिस्पर्धीबीच उनले दोस्रो स्थान हासिल गर्दै नेपाली प्रतिभाको अन्तर्राष्ट्रिय स्तर प्रमाणित गरे। त्यो उपलब्धिले  उनको व्यक्तिगत सफलता मात्र होइन, नेपालको पाककलाले पनि विश्वस्तरमा प्रतिस्पर्धा गर्न सक्ने सन्देश दिएको थियो।

त्यसपछि युएईको प्रसिद्ध सालोन कुलिनरी तथा कतारको प्रतिष्ठित अल दियाफा कुलिनरी प्रतियोगितामा समेत उनले आफ्ना सिर्जनात्मक पेस्ट्री तथा डेजर्टमार्फत स्वर्ण र रजत पदकहरू जित्दै अन्तर्राष्ट्रिय पाककला क्षेत्रमा आफ्नो प्रभाव अझ बलियो बनाएका छन्।

लक्जरी हस्पिटालिटी उद्योगमा पुर्‍याएको विशिष्ट योगदानको कदरस्वरूप उनी NL International Hospitality Award 2024बाट सम्मानित भएका छन्।

यो सम्मान एउटा ट्रफी होइन, बरु विश्व हस्पिटालिटी क्षेत्रमा नेपाली सेफहरूले निर्माण गरिरहेको नयाँ इतिहासको प्रतीक मानिएको छ।

सरोज थापाको करियरको अर्को अत्यन्त गौरवपूर्ण अध्याय तब लेखियो, जब उनले साउदी अरेबियास्थित केम्पिन्स्की अल ओथमान होटलमा कार्यरत रहँदा विश्वप्रसिद्ध फुटबल सुपरस्टार क्रिस्टियानो रोनाल्डोको विशेष खानपान व्यवस्थापन गर्ने अवसर प्राप्त गरे।

उच्च पोषण, कडा स्वास्थ्य मापदण्ड र व्यक्तिगत डाइट योजनाअनुसार तयार गरिने खानाको व्यवस्थापन अत्यन्त संवेदनशील जिम्मेवारी मानिन्छ। यस्तो जिम्मेवारी सफलतापूर्वक सम्हाल्नु नेपाली सीपप्रतिको अन्तर्राष्ट्रिय विश्वासको उत्कृष्ट उदाहरण बनेको छ।

सरोज थापाले अफ्रिकाको कङ्गोस्थित केम्पिन्स्की ब्राजाभिलको प्रि–ओपनिङ टास्क फोर्स टोलीमा नेतृत्वदायी भूमिका निभाएका थिए। नयाँ होटल सञ्चालन हुनुअघि सम्पूर्ण पेस्ट्री तथा बेकरी विभागको अवधारणा निर्माण, मेनु विकास, उत्पादन प्रणाली र सञ्चालन व्यवस्थापनमा उनको महत्वपूर्ण योगदान रहेको बताइन्छ। यसले नेपाली सेफहरू केवल उत्कृष्ट कुक मात्र होइन, सफल व्यवस्थापक र प्रशिक्षक पनि हुन सक्छन् भन्ने प्रमाणित गरेको छ।

सीपलाई अझ परिस्कृत बनाउन सरोज थापाले पेस्ट्री तथा बेकरी विधामा फ्रान्स र जर्मनीबाट एडभान्स डिप्लोमा हासिल गरेका छन्। यति मात्र होइन, उनी विश्व पाककलाको प्रतिष्ठित संस्था Worldchefsको आधिकारिक निर्णायक प्यानलमा समेत आबद्ध भई सन् २०१८ मा विभिन्न अन्तर्राष्ट्रिय प्रतियोगिताहरूमा डेजर्ट तथा पेस्ट्री जजको भूमिका निर्वाह गरिसकेका छन्। यस उपलब्धिले नेपाली सेफहरू विश्वस्तरमा प्रतिस्पर्धी मात्र होइन, निर्णायक बन्ने हैसियतमा पुगेको सन्देश दिएको छ।

विशेष कुराकानीका क्रममा सेफ सरोज थापाले आफ्नो जीवनको सबैभन्दा ठूलो सपना नेपालकै मौलिक स्वादलाई विश्व बजारमा स्थापित गर्नु रहेको बताए।

उनका अनुसार नेपालको प्रसिद्ध जुजु धौलाई आधुनिक प्रविधिसँग संयोजन गर्दै ‘बेक्ड जुजु धौ केक’ लगायत नेपाली जडीबुटी र मौलिक सामग्रीमा आधारित फ्युजन डेजर्टलाई अन्तर्राष्ट्रिय लक्जरी होटल उद्योगमा परिचित गराउने तयारी भइरहेको छ।

उनले युवा नेपाली सेफहरूलाई अन्तर्राष्ट्रिय स्तरमा प्रतिस्पर्धी बनाउन आवश्यक ज्ञान, अनुभव र मेन्टरसिप प्रदान गर्न आफू सधैँ तयार रहेको पनि बताए।

उनको भनाइ छ, “सफल सेफ त्यो होइन जसले आफैँ मात्र राम्रो खाना बनाउँछ, सफल सेफ त्यो हो जसले आफ्नो टोलीलाई आफूभन्दा अझ सक्षम बनाउँछ।”

धादिङको एउटा गाउँबाट सुरु भएको यो यात्रा आज विश्वका प्रतिष्ठित होटलहरूको नेतृत्वसम्म पुगेको छ। यो कथा  एक व्यक्तिको सफलता होइन, नेपाली युवाको क्षमता, मेहनत र सम्भावनाको जिउँदो प्रमाण हो।

फ्रान्स र जर्मनीमा उच्च शिक्षा, विश्वभरका पाँचतारे होटलहरूमा नेतृत्व, अन्तर्राष्ट्रिय प्रतियोगितामा ऐतिहासिक सफलता, विश्व फुटबलका महानायक क्रिस्टियानो रोनाल्डोको खानपान व्यवस्थापन र नयाँ पुस्ताका नेपाली सेफहरूलाई मार्गदर्शन गर्ने अभियान—यी सबै उपलब्धिले सेफ सरोज थापालाई विश्व हस्पिटालिटी उद्योगमा नेपालको गौरवका रूपमा स्थापित गरेको छ।

आज उनका सफलताका हरेक पाइलाले एउटा सन्देश दिइरहेको छ—सपना ठूलो हुनुपर्छ, मेहनत निरन्तर हुनुपर्छ, अनि नेपाली प्रतिभालाई विश्वले अवश्य सम्मान गर्छ।