काठमाडौं । नेपाली कांग्रेसले आगामी १५औँ महाधिवेशनको तयारीलाई तीव्रता दिँदै देशभर नयाँ क्रियाशील सदस्यता वितरण अभियानलाई व्यवस्थित बनाउन ७७ वटै जिल्लामा केन्द्रीय प्रतिनिधि खटाएको छ।

पार्टीका कार्यवाहक मुख्य सचिव कृष्णप्रसाद दुलालका अनुसार सदस्यता वितरण प्रक्रियालाई प्रभावकारी, पारदर्शी र मर्यादित बनाउन केन्द्रीय तहबाट प्रतिनिधिहरू परिचालन गरिएको हो। तोकिएका प्रतिनिधिहरूले असार ७ गतेदेखि २० गतेसम्म सम्बन्धित जिल्लामा रहेर सदस्यता वितरण, समन्वय र सहजीकरणको जिम्मेवारी निर्वाह गर्नेछन्।

कांग्रेसले यसपटक विशेष गरी ३५ वर्षमुनिका युवाहरूलाई पार्टी संगठनमा आकर्षित गर्ने रणनीति अघि सारेको छ। नयाँ सदस्यता वितरण अभियानमार्फत युवा पुस्ताको सहभागिता बढाउँदै संगठनलाई थप गतिशील र सशक्त बनाउने लक्ष्य पार्टीले लिएको जनाएको छ।

केन्द्रीय प्रतिनिधिहरूलाई दिइएको कार्यादेशमा युवा सहभागितालाई प्राथमिकता दिन स्पष्ट निर्देशन दिइएको छ। पार्टीले आगामी महाधिवेशनलाई लक्षित गर्दै संगठन विस्तार, सदस्यता व्यवस्थापन र नयाँ पुस्ताको नेतृत्व विकासमा विशेष जोड दिएको छ।

कांग्रेस नेतृत्वले यो अभियानले पार्टीको आधारभूत संगठनलाई बलियो बनाउनुका साथै आगामी महाधिवेशनका लागि आवश्यक संगठनात्मक तयारीलाई थप मजबुत बनाउने विश्वास व्यक्त गरेको छ। देशभर सञ्चालन भइरहेको सदस्यता वितरण अभियानलाई सफल बनाउन स्थानीय नेतृत्व, भ्रातृ तथा शुभेच्छुक संस्थाहरूलाई समेत सक्रिय भूमिका निर्वाह गर्न आग्रह गरिएको छ।

महाधिवेशन नजिकिँदै जाँदा कांग्रेसले संगठन सुदृढीकरण, नयाँ सदस्य विस्तार र युवाहरूको आकर्षण बढाउने अभियानलाई प्राथमिकताका साथ अगाडि बढाएको देखिएको छ। पार्टीभित्र नयाँ ऊर्जा र नेतृत्व विकासका लागि यो अभियान महत्वपूर्ण हुने नेताहरूको भनाइ छ।