काठमाडौं, असार १९ । गोकर्णेश्वर नगरपालिका वडा नं. ९ को आयोजनामा तथा शुभम मल्टिमिडियाको सहजीकरणमा सामुदायिक विद्यालयमा अध्ययनरत विपन्न विद्यार्थी लक्षित जनचेतना तथा छात्रवृत्ति कार्यक्रम श्री अरुणोदय माध्यमिक विद्यालयमा भव्य रूपमा सम्पन्न भएको छ।

करिब तीन घण्टासम्म सञ्चालन भएको कार्यक्रममा १५० जना विद्यार्थी, शिक्षक, अभिभावक तथा सरोकारवालाहरूको सहभागिता रहेको थियो। कार्यक्रममा वडा सदस्य लक्ष्मी गुरुङ र वडा सदस्य श्रीकृष्ण कारञ्जित को विशेष उपस्थिति रहेको थियो भने कार्यक्रमको संयोजन कल्पना शर्मा ले गर्नुभएको थियो।

कार्यक्रममा विद्यार्थीहरूलाई छात्रवृत्ति वितरण गर्नुका साथै उनीहरूका जिज्ञासा, समस्या र सुझावबारे खुला अन्तरक्रिया गरिएको थियो। कार्यक्रममा विद्यार्थीहरूले छात्रवृत्ति, शिक्षा, पूर्वाधार, खेलकुद, यातायात तथा खाजा व्यवस्थापनलगायतका विषयमा खुलेर प्रश्न राखेका थिए।

विद्यार्थीहरूले “छात्रवृत्ति पाउन के गर्नुपर्छ ?” भन्ने प्रश्न राखेका थिए। त्यसको जवाफमा वडा सदस्य लक्ष्मी गुरुङले भन्नुभयो, “नियमित विद्यालय आउने, अनुशासित रहने, अध्ययनमा मेहनत गर्ने र वास्तविक रूपमा आर्थिक अवस्था कमजोर भएका विद्यार्थीहरूलाई प्राथमिकतामा राखेर छात्रवृत्ति प्रदान गरिन्छ। विद्यालय र वडा कार्यालयको सिफारिसका आधारमा पारदर्शी ढंगले छनोट गरिन्छ।”

त्यसैगरी विद्यार्थीहरूले विद्यालयसम्म आउने बाटो साँघुरो र कतिपय स्थानमा जीर्ण रहेको समस्या उठाएका थिए। यस सम्बन्धमा वडा सदस्य श्रीकृष्ण कारञ्जितले भन्नुभयो, “विद्यालयसँग सम्बन्धित पूर्वाधार विकास वडा कार्यालयको प्राथमिकतामा रहेको छ। बाटो सुधारका लागि आवश्यक बजेट व्यवस्थापन र सम्बन्धित निकायसँग समन्वय गरेर काम अघि बढाइनेछ।”

कार्यक्रममा विद्यार्थीहरूले खेलकुद सामग्रीको अभाव रहेको गुनासो गर्दै खेलकुदलाई प्राथमिकता दिन आग्रह गरेका थिए। जवाफमा जनप्रतिनिधिहरूले विद्यालयमा खेलकुद सामग्री उपलब्ध गराउने र अतिरिक्त खेलकुद गतिविधि सञ्चालनका लागि पहल गर्ने प्रतिबद्धता जनाए।

विद्यार्थीहरूले कक्षाकोठा सानो भएकाले पढाइमा असहजता भएको गुनासो पनि गरेका थिए। त्यसको जवाफमा वडा सदस्य लक्ष्मी गुरुङले भन्नुभयो, “विद्यालय व्यवस्थापन समिति र नगरपालिकासँग समन्वय गरी थप कक्षाकोठा निर्माण तथा मर्मतका लागि आवश्यक पहल गरिनेछ।”

त्यसैगरी विद्यालयको शौचालय सानो र अपर्याप्त भएको विषयमा विद्यार्थीहरूले ध्यानाकर्षण गराएका थिए। जनप्रतिनिधिहरूले विद्यार्थीको संख्या अनुसार पर्याप्त र व्यवस्थित शौचालय निर्माणका लागि सम्बन्धित निकायसँग पहल गर्ने आश्वासन दिएका थिए।

कार्यक्रममा विद्यालय बसको व्यवस्था नभएकाले टाढाबाट आउने विद्यार्थीहरूलाई कठिनाइ भएको विषय पनि उठाइएको थियो। यसबारे वडा सदस्य श्रीकृष्ण कारञ्जितले भन्नुभयो, “विद्यालय बसको विषय महत्वपूर्ण छ। तत्काल सम्भव नभए पनि नगरपालिकासँग समन्वय गरेर दीर्घकालीन समाधान खोज्ने प्रयास गरिनेछ।”

विद्यार्थीहरूले विद्यालयमा खाजा व्यवस्थाको माग गर्दै आर्थिक रूपमा कमजोर परिवारका बालबालिकालाई मध्याह्न भोजन वा खाजा कार्यक्रम सञ्चालन गर्न आग्रह गरेका थिए। यस विषयमा वडा सदस्यहरूले सम्बन्धित निकाय र नगरपालिकासँग छलफल गरी सम्भावित कार्यक्रम ल्याउने प्रतिबद्धता व्यक्त गरेका थिए।

कार्यक्रमका संयोजक कल्पना शर्मा ले विद्यार्थीहरूले आफ्ना समस्या प्रत्यक्ष रूपमा राख्न पाउनु नै कार्यक्रमको उपलब्धि भएको बताउँदै भन्नुभयो, “विद्यार्थीहरूका आवाज सुन्ने र समाधानका लागि पहल गर्ने उद्देश्यले यो कार्यक्रम आयोजना गरिएको हो। शिक्षा क्षेत्रको विकासमा सबै पक्षको सहकार्य आवश्यक छ।”

शुभम मल्टिमिडियाका अध्यक्ष मुकुन्द ढुंगाना ले विद्यार्थीहरूलाई प्रेरणा दिँदै भन्नुभयो, “समस्या जहाँ पनि हुन्छन्, तर समस्यालाई अवसरमा बदल्ने शक्ति विद्यार्थीभित्र हुनुपर्छ। मेहनत, अनुशासन र सकारात्मक सोचका साथ अघि बढ्ने विद्यार्थीलाई सफल हुन कसैले रोक्न सक्दैन। आज उठाइएका प्रश्नहरू केवल विद्यालयका समस्या मात्र होइनन्, यी भविष्य निर्माणका आधारहरू हुन्। स्थानीय सरकार, विद्यालय र समुदाय मिलेर समाधान खोज्नुपर्छ।”

विद्यालयका शिक्षकहरूले पनि विद्यार्थीहरूले खुलेर आफ्ना कुरा राखेकोमा खुशी व्यक्त गर्दै यस्ता कार्यक्रमले विद्यार्थी र जनप्रतिनिधिबीचको दूरी कम गर्ने बताएका थिए।

कार्यक्रमको अन्त्यमा सहभागी विद्यार्थीहरूले आफूहरूले उठाएका समस्यामा जनप्रतिनिधिबाट सकारात्मक प्रतिबद्धता प्राप्त भएको भन्दै खुशी व्यक्त गरेका थिए। गोकर्णेश्वर नगरपालिका वडा नं. ९ ले आगामी दिनमा पनि विद्यार्थी केन्द्रित जनचेतना, क्षमता विकास तथा छात्रवृत्ति कार्यक्रमलाई निरन्तरता दिने जनाएको छ।