काठमाडौं । सम्पत्ति शुद्धीकरण सम्बन्धी कसुरमा अनुसन्धानका लागि दीपक भट्ट र सुलभ अग्रवालमाथि काठमाडौं जिल्ला अदालतले थप सात दिन हिरासतमा राख्न अनुमति दिएको छ।

न्यायाधीश तिलक बहादुर कार्कीको इजलासले सम्पत्ति शुद्धीकरण अनुसन्धान विभागको निवेदन र दुवै पक्षका अधिवक्ताहरूको बहसपछि उक्त आदेश जारी गरेको हो।

विभागले अनुसन्धान कार्य अन्तिम चरणमा पुगेको तर थप केही प्रक्रियाहरू बाँकी रहेको भन्दै ३० दिनको म्याद माग गरेको थियो। तर अदालतले प्रारम्भिक रूपमा ७ दिन मात्र म्याद थप गर्ने निर्णय गरेको हो।

सम्पत्ति शुद्धीकरण (मनी लाउण्डरिङ) निवारण ऐन, २०६४ को दफा १७ को उपदफा (४) बमोजिम उक्त म्याद थप गरिएको अदालतले जनाएको छ।

यसअघि प्रतिवादीहरूका तर्फबाट वरिष्ठ अधिवक्ताहरू कृष्ण प्रसाद सापकोटा, सविता भण्डारी बराल तथा अधिवक्ताहरू सुरेन्द्र कुमार महतो, रमण कुमार कर्णलगायतले बहस गरेका थिए भने विभागका अनुसन्धान अधिकृतहरूले पनि आफ्नो पक्ष प्रस्तुत गरेका थिए।

अदालतले बाँकी अनुसन्धान कार्य शीघ्र सम्पन्न गरी रायसहितको प्रतिवेदन पेश गर्न विभागलाई निर्देशन समेत दिएको छ।