काठमाडौं । रसुवा जिल्लाको भोटेकोशी नदीमा आएको आकस्मिक बाढीबाट प्रभावित नागरिकको राहत, उद्धार तथा पुनर्स्थापना कार्यमा सहयोग पुर्‍याउन बुढानीलकण्ठ नगरपालिकाले १५ लाख ७२ हजार रुपैयाँ आर्थिक सहयोग गर्ने निर्णय गरेको छ।

नगरपालिकामा २०८३ भदौ १० गते बसेको बैठकले नगरपालिकासहित मातहतका कार्यालयमा कार्यरत कर्मचारीबाट संकलित उक्त रकम प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको हो।

विपद्को कठिन परिस्थितिमा बाढी प्रभावित नागरिकप्रति ऐक्यबद्धता, मानवीय संवेदना र सामाजिक उत्तरदायित्व व्यक्त गर्दै नगरपालिकाले राहत, उद्धार तथा पुनर्स्थापना अभियानमा आफ्नो तर्फबाट निरन्तर सहयोग गर्ने प्रतिबद्धता जनाएको छ।

विपद्मा बुढानीलकण्ठको मानवीय साथ

बाढीका कारण ठूलो जनधनको क्षति भइरहेको अवस्थामा बुढानीलकण्ठ नगरपालिकाले आफ्ना कर्मचारीबाट रकम संकलन गरी राहत कोषमा सहयोग गर्ने निर्णय गर्नु स्थानीय सरकारको मानवीय संवेदना र सामाजिक उत्तरदायित्वको उदाहरणका रूपमा देखिएको छ।

नगरपालिकाले प्रभावित क्षेत्रमा आवश्यक राहत तथा सहयोग उपलब्ध गराउन सम्बन्धित सरकारी निकाय, स्थानीय तह तथा सरोकारवाला संस्थासँग आवश्यक समन्वय र सहकार्य गर्ने जनाएको छ।

आवश्यक परे मेडिकल टोली परिचालन गरिने

बाढी प्रभावित क्षेत्रमा स्वास्थ्य सेवाको आवश्यकता पर्न सक्ने अवस्थालाई मध्यनजर गर्दै नगरपालिकाले बुढानीलकण्ठ नगर अस्पतालको Rapid Response Medical Team (RRT) लाई आवश्यकताअनुसार पूर्ण रूपमा परिचालन गर्ने निर्णयसमेत गरेको छ।

विपद् प्रभावित क्षेत्रमा घाइते तथा बिरामीको तत्काल उपचार, स्वास्थ्य परीक्षण तथा आवश्यक स्वास्थ्य सेवा उपलब्ध गराउन मेडिकल टोली परिचालन गर्न सकिने नगरपालिकाले जनाएको छ।

राहत, उद्धार र पुनर्स्थापनामा सहकार्यको अपिल

बुढानीलकण्ठ नगरपालिकाले बाढी तथा विपद्बाट प्रभावित नागरिकको शीघ्र उद्धार, राहत वितरण तथा पुनर्स्थापनाका लागि सबै पक्षलाई प्रभावकारी समन्वय र सहकार्यमा जुट्न आग्रह गरेको छ।

प्राकृतिक विपद्को समयमा स्थानीय सरकार, सुरक्षा निकाय, स्वास्थ्यकर्मी, सामाजिक संघसंस्था, निजी क्षेत्र तथा आम नागरिकको संयुक्त प्रयास आवश्यक हुने भन्दै नगरपालिकाले मानवीय सहयोगलाई प्राथमिकता दिन आह्वान गरेको छ।