काठमाडौँ।  नेपालमा पुनः मौसम बदली भई आज (शुक्रबार)देखि देशका विभिन्न क्षेत्रमा वर्षा, हुरीबतास, चट्याङ तथा असिना पर्ने सम्भावना रहेको छ।

जल तथा मौसम विज्ञान विभाग का अनुसार शुक्रबार र शनिबार मौसम थप बदली हुने र वर्षाको गतिविधि बढ्ने भएकाले आवश्यक सतर्कता अपनाउन अनुरोध गरिएको छ। विभागका सूचना अधिकारी दिनकर कायस्थका अनुसार बिहीबार साँझदेखि बदली सुरु भइसकेको र शुक्रबारदेखि विभिन्न स्थानमा वर्षा हुने सम्भावना छ।

बिहीबार साँझ गोरखा, सिन्धुपाल्चोक, कास्की, लमजुङ, सङ्खुवासभा, खोटाङ र नुवाकोट लगायत क्षेत्रमा वर्षा भएको थियो। यो क्रम शुक्रबार रातिदेखि अझ सक्रिय हुने जनाइएको छ।

मौसम बुलेटिनअनुसार शुक्रबार हिमाली क्षेत्रमा आंशिक बदली र पहाडी क्षेत्रमा सामान्यदेखि पूर्ण बदली रहनेछ। साथै, देशका पहाडी तथा हिमाली भूभागका केही स्थान र तराईका एक–दुई स्थानमा मेघगर्जन, चट्याङ, हावाहुरी र असिनासहित मध्यम वर्षा तथा उच्च हिमाली क्षेत्रमा हिमपातको सम्भावना रहेको छ।

शनिबार कोशी प्रदेश, मधेस प्रदेश, बागमती प्रदेश, गण्डकी प्रदेश र लुम्बिनी प्रदेश मा सामान्य बदली रहनेछ भने अन्य क्षेत्रमा आंशिक बदली रहने अनुमान गरिएको छ। ती प्रदेशका केही स्थान र अन्य पहाडी तथा हिमाली भूभागका थोरै स्थानमा मेघगर्जन र चट्याङसहित वर्षा तथा हिमपात हुन सक्ने विभागले जनाएको छ।

हुरीबतास, चट्याङ र असिनाबाट हुन सक्ने क्षतिबाट जोगिन विभागले सर्वसाधारणलाई सतर्क रहन आग्रह गरेको छ।