काठमाडौं । चुनावी माहोल क्रमशः तात्दै गएको काठमाडौं क्षेत्र नं. १० मा नेपाली काँग्रेस निकट युवाहरूको सक्रियतामा सम्पन्न “बृहत तरुण तथा जेन(जी) संवाद कार्यक्रम” ले राजनीतिक वृत्तमा नयाँ तरंग मात्र होइन, सम्भावित चुनावी समीकरणसमेत हल्लाएको छ। युवाहरूको उत्साह, धारिला प्रश्न र उम्मेदवारको प्रतिवद्धताले कार्यक्रमलाई औपचारिकताभन्दा धेरै अगाडि लैजाँदै बहस र बहसपछि परिणामको संकेत दिने मंचका रूपमा स्थापित गर्‍यो।

कार्यक्रमको सभापतित्व इश्वर लामा ले गर्नुभएको थियो। उहाँ नेपाल तरुण दल क्षेत्र नं. १० का अध्यक्ष तथा महासमिति सदस्यसमेत हुनुहुन्छ। आफ्नो स्वागत मन्तव्यमा लामाले जेन(जी) पुस्ता केवल दर्शक नभई परिवर्तनको चालक शक्ति भएको जिकिर गर्दै परम्परागत राजनीतिक शैलीभन्दा फरक, उत्तरदायी र परिणाममुखी नेतृत्वको आवश्यकता औंल्याउनुभयो।

कार्यक्रमका प्रमुख अतिथि राजेन्द्र कुमार केसी—नेपाली काँग्रेस का केन्द्रीय सदस्य, पूर्व मन्त्री तथा क्षेत्र नं. १० का निवर्तमान सांसद—ले युवा सहभागिताबिना लोकतन्त्र सुदृढ नहुने स्पष्ट पार्नुभयो। “युवाले प्रश्न गर्ने, जवाफ माग्ने र नेतृत्वलाई जिम्मेवार बनाउने अभ्यास नै सच्चा लोकतन्त्र हो,” उहाँले भन्नुभयो। नेपालको इतिहासका गम्भीर मोडहरूमा नेपाली काँग्रेसले नेतृत्वदायी भूमिका खेलेको स्मरण गर्दै उहाँले यसपटक पनि जनताको ‘सही अभिमत’ आउनेमा विश्वास व्यक्त गर्नुभयो।

कार्यक्रममा दिपेन्द्र आचार्य, पुकार महर्जन र यमुना श्रेष्ठ लगायत प्रदेश तहका नेताहरूको विशिष्ट उपस्थिति थियो। त्यस्तै, घनश्याम गिरी (मेयर, चन्द्रागिरि नगरपालिका) र कृष्णमान डंगोल (मेयर, कीर्तिपुर नगरपालिका) को सहभागिताले स्थानीय तह र संघीय राजनीतिको सेतुका रूपमा कार्यक्रमलाई थप महत्व दिएको थियो।

कार्यक्रमको सबैभन्दा चर्चित खण्ड उम्मेदवारसँगको प्रत्यक्ष प्रश्न–उत्तर सत्र रह्यो। जेन(जी) समूहबाट संकलित प्रश्नहरू बेरोजगारी, उद्यमशीलता, शिक्षा सुधार, डिजिटल सीप विकास, स्टार्टअप इकोसिस्टम र स्थानीय पूर्वाधार विस्तार जस्ता मुद्दामा केन्द्रित थिए।

क्षेत्र नं. १० का उम्मेदवार हिमाल कार्की ले युवाका जिज्ञासामा जवाफ दिँदै रोजगार सिर्जना, सीपमूलक तालिम, स्थानीय उद्योग प्रवर्द्धन तथा पारदर्शी सेवा प्रवाहलाई प्राथमिकतामा राख्ने कार्ययोजना प्रस्तुत गर्नुभयो। “युवालाई वैदेशिक रोजगारीको बाध्यता होइन, स्वदेशमै सम्भावनाको वातावरण दिनु हाम्रो लक्ष्य हो,” उहाँले प्रतिबद्धता जनाउनुभयो।

कार्यक्रममा क्षेत्रीय समिति, महाधिवेशन प्रतिनिधि, वडा सभापतिहरू, जनप्रतिनिधि, भातृ तथा शुभेच्छुक संस्थाका पदाधिकारी तथा उल्लेख्य संख्यामा जेन(जी) युवाहरूको सहभागिता थियो। सहभागी युवाहरूको सक्रिय उपस्थिति र प्रश्नले यसपटकको निर्वाचनमा युवा मत निर्णायक बन्न सक्ने संकेत दिएको राजनीतिक विश्लेषकहरू बताउँछन्।

विशेषगरी, काठमाडौं–१० जस्तो शहरी निर्वाचन क्षेत्रमा डिजिटल रूपमा सचेत, नीतिमुखी बहस चाहने र प्रत्यक्ष जवाफ खोज्ने जेन(जी) मतदाता प्रभावकारी बन्दै गएको विश्लेषण गरिएको छ। यस संवाद कार्यक्रमले परम्परागत चुनावी सभाको शैली तोड्दै नीति, योजना र जवाफदेहितालाई केन्द्रमा ल्याएको टिप्पणी भइरहेको छ।

स्थानीय राजनीतिक वृत्तमा यो कार्यक्रमलाई केवल संगठनात्मक शक्ति प्रदर्शन नभई ‘युवा शक्ति प्रदर्शन’ का रूपमा हेरिएको छ। उम्मेदवारलाई खुला मञ्चमा प्रश्न गर्ने अभ्यासले पारदर्शिताको नयाँ सन्देश दिएको छ।

आगामी निर्वाचन नजिकिँदै जाँदा काठमाडौं क्षेत्र नं. १० मा युवा एजेन्डा, रोजगारी र सुशासनका सवालहरू केन्द्रमा आउने स्पष्ट संकेत यस कार्यक्रमले दिएको छ।