काठमाडौं । आसन्न प्रतिनिधिसभा निर्वाचनअन्तर्गत काठमाडौं क्षेत्र नम्बर ४ मा चुनावी गतिविधि तीव्र बनेको छ। यस क्षेत्रमा नेपाल कम्युनिष्ट पार्टी (एमाले)का प्रभावशाली नेता डा. राजन भट्टराई सशक्त र अनुभवी उम्मेदवारका रूपमा अघि देखिएका छन्।

बौद्धिक पृष्ठभूमि र कूटनीतिक अनुभव

डा. भट्टराई परराष्ट्र मामिलाका जानकार तथा कूटनीतिज्ञका रूपमा चिनिन्छन्। उनले University of Londonबाट स्नातकोत्तर तथा Jawaharlal Nehru Universityबाट विद्यावारिधि गरेका छन्।

नेपाल–भारत सम्बन्ध पुनरावलोकनका लागि गठन गरिएको प्रबुद्ध व्यक्तिहरूको समूह (EPG) मा सदस्यका रूपमा उनले भूमिका निर्वाह गरेका थिए। साथै, दुई पटक प्रधानमन्त्रीका परराष्ट्र सल्लाहकारका रूपमा कार्य गर्दै नेपालको अन्तर्राष्ट्रिय सम्बन्ध सुदृढीकरणमा योगदान पुर्‍याएको उल्लेख गरिन्छ।

विकास एजेण्डा र जनसम्बन्ध

स्थानीय बासिन्दाहरूका अनुसार डा. भट्टराई निर्वाचन परिणाम जस्तोसुकै भए पनि जनताको सुख–दुःखमा साथ दिने नेताका रूपमा परिचित छन्। सडक विस्तार, खानेपानी व्यवस्थापन, ढल निकास सुधार लगायतका पूर्वाधार विकासमा उनले निरन्तर चासो दिएको दाबी गरिन्छ।

स्थानीय मतदाताहरूले उनको बौद्धिक क्षमता, स्पष्ट विकास खाका र सरल व्यक्तित्वलाई सकारात्मक रूपमा लिएका छन्।

प्रतिस्पर्धी समीकरण

यसअघि पनि काठमाडौं–४ मा प्रतिस्पर्धा गरेका डा. भट्टराई यसपटक अनुकूल परिस्थिति रहेको आकलन गरिएको छ। नेपाली कांग्रेसका नेता गगन थापा यसपटक सार्लाही ४बाट चुनाव लड्ने चर्चा भइरहेका कारण काठमाडौं–४ को प्रतिस्पर्धी समीकरण फरक बनेको छ।

एमालेको सांगठनिक आधार, स्थानीय तहमा बनाएको व्यक्तिगत प्रभाव र विकासमुखी एजेण्डाले यस क्षेत्रको चुनावी माहोललाई थप रोचक बनाएको छ।