काठमाडौँ । पूर्वमन्त्री एवम् उज्यालो नेपाल पार्टीका अध्यक्ष कुलमान घिसिङको उपस्थितिमा आज निर्वाचन क्षेत्र नं. ४ अन्तर्गत पत्रकार–उम्मेदवार भेटघाट कार्यक्रम आयोजना गरिएको छ।

उक्त कार्यक्रममा पार्टीका उम्मेदवार जे.वि. दीपक अधिकारीले पत्रकारहरूसँग प्रत्यक्ष संवाद गर्दै सुशासन, समृद्धि र सामाजिक न्यायलाई केन्द्रमा राख्दै पार्टीको नीति, कार्यक्रम र भावी कार्ययोजनाबारे स्पष्ट पार्नेछन्।

पार्टीका अनुसार, पत्रकारहरूसँगको खुला छलफलमार्फत समसामयिक राजनीतिक अवस्था, विकास निर्माण र जनअपेक्षाबारे विचार आदान–प्रदान हुनेछ। उज्यालो नेपाल पार्टीले यस्ता संवादात्मक कार्यक्रमलाई लोकतान्त्रिक अभ्यासको महत्वपूर्ण पाटोको रूपमा लिएको बताएको छ।

कार्यक्रममा उपस्थित पत्रकारहरूलाई उम्मेदवारको योजनाबारे प्रत्यक्ष जानकारी प्राप्त गर्ने अवसर प्राप्त भएको थियो। यसरी पार्टीले सम्पर्क, पारदर्शिता र सहभागितामा आधारित चुनावी अभियानलाई अघि बढाएको देखिएको छ।