काठमाडौँ । संयुक्त राष्ट्र संघको खाद्य तथा कृषि संगठन (एफएओ) को पछिल्लो प्रतिवेदन अनुसार, विश्वव्यापी खाद्यान्न मूल्य लगातार पाँचौं महिनासम्म घटेको छ। दूध, चिनी र मासु जस्ता आवश्यक उत्पादनहरूको मूल्य अन्तर्राष्ट्रिय बजारमा गिरावट आएको छ, यद्यपि चामल र वनस्पति तेलको बढ्दो मूल्य भने चिन्ताको विषय बनेको छ।

एफएओका अनुसार, जनवरी २०२६ मा विश्वव्यापी खाद्य मूल्य सूचकांक औसत १२३.९ अंक रहेको छ। यो डिसेम्बर २०२५ को तुलनामा ०.४ प्रतिशत कम र गत वर्षको सोही अवधिको तुलनामा ०.६ प्रतिशत कम हो। प्रतिवेदनले विश्वव्यापी बजारमा समग्र राहत देखिए पनि केही आवश्यक वस्तुमा मुद्रास्फीतिले आगामी महिनामा चुनौती सिर्जना गर्न सक्ने चेतावनी दिएको छ।

अन्नको मूल्य जनवरीमा ०.२ प्रतिशतले बढेको छ र अन्न मूल्य सूचकांक औसत १०७.५ अंकमा पुगेको छ। सो अवधिमा गहुँ र मकैको विश्वव्यापी मूल्यमा थोरै गिरावट आएको बताइएको छ। एफएओका अनुसार पर्याप्त विश्वव्यापी गहुँको भण्डारले रूस र संयुक्त राज्य अमेरिकामा मौसमसँग सम्बन्धित चिन्तालाई सीमित गरेको छ। साथै, अर्जेन्टिना र अष्ट्रेलियामा राम्रो उत्पादनको अपेक्षा र उच्च विश्वव्यापी भण्डारले मूल्य नियन्त्रणमा मद्दत गरेको छ।

तर, जनवरीमा चामलको मूल्य १.८ प्रतिशतले बढेको छ। यसबाहेक, वनस्पति तेलको मूल्य बढ्ने क्रम जारी रहेको छ, जसले केही देशमा खाद्यान्न महँगो हुने चिन्ता बढाएको छ।

चिनीको मूल्य जनवरीमा १ प्रतिशतले घटेको छ। डिसेम्बर २०२५ मा ९०.७ रहेको चिनी मूल्य सूचकांक जनवरीमा ८९.८ पुगेको छ। यस गिरावटको मुख्य कारण भारतमा उत्पादन वृद्धि, थाइल्याण्डबाट सकारात्मक संकेत र ब्राजिलमा राम्रो उत्पादनको अनुमान हो, जसले विश्वव्यापी आपूर्तिमा वृद्धि हुने अपेक्षा जगाएको छ।