काठमाडौँ ।  विश्व स्वास्थ्य संगठन (डब्लुएचओ) ले सन् २०२६ मा विश्वभर देखिएका गम्भीर स्वास्थ्य आपतकालीन अवस्थाहरूको सामना गर्न करिब एक अर्ब अमेरिकी डलर बराबरको सहयोग आवश्यक रहेको भन्दै अन्तर्राष्ट्रिय समुदायसँग आपतकालीन आह्वान गरेको छ।

डब्लुएचओका अनुसार युद्ध, आन्तरिक द्वन्द्व, प्राकृतिक प्रकोप, सङ्क्रामक रोगको फैलावट र कमजोर स्वास्थ्य प्रणालीका कारण करोडौँ मानिसहरू उच्च जोखिममा छन्। धेरै देशमा स्वास्थ्य संरचना ध्वस्त हुँदा अस्पताल, औषधि, स्वास्थ्य उपकरण र दक्ष जनशक्तिको अभावले सामान्य उपचारसमेत प्रभावित भएको छ।

सङ्गठनले गाजा, सुडान, कङ्गो लोकतान्त्रिक गणराज्य र हाइतीलगायत क्षेत्रहरूलाई अत्यन्त सङ्कटग्रस्त क्षेत्रका रूपमा चिनाएको छ। ती क्षेत्रमा गर्भवती महिला, बालबालिका, वृद्ध तथा दीर्घ रोगीहरू सबैभन्दा बढी जोखिममा रहेका छन्।

कुपोषण, सङ्क्रामक रोग, मानसिक स्वास्थ्य समस्या तथा मातृ र नवजात शिशु मृत्यु दर तीव्र रूपमा बढिरहेको डब्लुएचओले जनाएको छ। सुरक्षित खानेपानी, सरसफाइ र खोप सेवामा पहुँच कमजोर हुँदा रोगको जोखिम झन् बढेको छ।

आवश्यक आर्थिक सहयोग समयमै जुटाउन नसकिए जीवनरक्षक उपचार, रोग नियन्त्रण कार्यक्रम र आपतकालीन स्वास्थ्य सेवामा गम्भीर असर पर्ने चेतावनी दिँदै संगठनले सरकार, दातृ निकाय र अन्तर्राष्ट्रिय साझेदारहरूलाई तत्काल मानवीय सहयोग गर्न आग्रह गरेको छ।