बूढानीलकण्ठ, काठमाडौँ। बूढानीलकण्ठ नगरपालिका वडा नम्बर ३ मा अवस्थित माहुरी पालन महिला समूहलाई ११ थान माहुरीसहित घार वितरण गरिएको छ। वडा नम्बर ३ को आर्थिक वर्ष २०८२/२०८३ का लागि विनियोजित बजेट अन्तर्गत मिति २०८२/०९/११ गते उक्त सामग्री वितरण गरिएको हो।

स्थानीय महिलाहरूलाई आत्मनिर्भर बनाउने, आयआर्जनका अवसर सिर्जना गर्ने तथा व्यावसायिक कृषिलाई प्रोत्साहन गर्ने उद्देश्यले माहुरी पालन कार्यक्रम सञ्चालन गरिएको वडा कार्यालयले जनाएको छ। वितरण कार्यक्रममा वडा प्रतिनिधि, महिला समूहका सदस्य तथा स्थानीय बासिन्दाको सहभागिता रहेको थियो।

माहुरी पालन : आय, कृषि र वातावरणका लागि फाइदाजनक

माहुरी पालनलाई कम लगानीमा राम्रो आम्दानी दिने व्यवसायका रूपमा लिइन्छ। यसबाट मह, मौरीको मैन, परागकण (Pollination) जस्ता उत्पादन प्राप्त हुनुका साथै तरकारी, फलफूल र बाली उत्पादनमा उल्लेखनीय वृद्धि हुन्छ। माहुरीको परागसेचनले कृषकको उत्पादन क्षमता बढाउने भएकाले यो कार्यक्रमले सम्पूर्ण वडाको कृषि प्रणालीलाई समेत सकारात्मक प्रभाव पार्ने अपेक्षा गरिएको छ।

विशेषगरी महिला समूहमार्फत सञ्चालन हुने माहुरी पालनले

• महिलाको आर्थिक सशक्तीकरण,

• घरमै बसेर आयआर्जन,

• सामूहिक व्यवसाय विकास,

• जैविक तथा वातावरणमैत्री कृषि प्रवर्द्धन
  मा महत्वपूर्ण भूमिका खेल्ने विश्वास लिइएको छ।

दिगो विकासतर्फ वडाको पहल

वडा कार्यालयले स्थानीय स्रोत र सीपको उपयोग गर्दै उत्पादनमुखी र रोजगारीमुखी कार्यक्रमलाई प्राथमिकता दिँदै आएको जनाएको छ। माहुरी पालन जस्तो दिगो र वातावरणमैत्री कार्यक्रमले महिलाहरूलाई स्वरोजगारतर्फ उन्मुख गराउनुका साथै स्थानीय अर्थतन्त्र सुदृढ गर्ने अपेक्षा गरिएको छ।

कार्यक्रममा सहभागी महिला समूहका सदस्यहरूले वडाबाट प्राप्त सहयोगप्रति आभार व्यक्त गर्दै, माहुरी पालनलाई व्यवस्थित र व्यवसायिक रूपमा अगाडि बढाउने प्रतिबद्धता जनाएका छन्।

कृषि, आय र आत्मनिर्भरताको संगम बनेको माहुरी पालन कार्यक्रम बूढानीलकण्ठ–३ मा महिलाको जीवनस्तर उकास्ने महत्वपूर्ण आधार बन्ने विश्वास गरिएको छ।