काठमाडौँ । बुढानीलकण्ठ नगरपालिका–३ मा बुढानीलकण्ठ चेतनशील महिला समाजद्वारा आयोजित भव्य योमरी महोत्सव उत्साह, रौनक र सांस्कृतिक पहिचानसँगै सम्पन्न भएको छ। नेवारी समुदायको महत्वपूर्ण चाड यःमरी पुन्ही को अवसर पारेर आयोजना गरिएको यस महोत्सवमा स्थानीय बासिन्दा, समुदायका प्रतिनिधि, महिलाहरू र युवाहरूको उल्लेखनीय उपस्थिति देखिएको थियो।

महोत्सवमा परम्परागत नेवारी खानाको स्वाद, स्थानीय उत्पादन, हस्तकलाका सामग्री, सांस्कृतिक नृत्य, गीत–संगीत तथा विविध stall हरूले आकर्षण प्रदान गरे। विशेषगरी ठूलो संख्यामा तयार पारिएको विभिन्न प्रकारका योमरी— चाकु, खुवा, तिल, चकलेटयुक्त लगायतका स्वादहरूले सबैको मन जित्यो।

चेतनशील महिला समाजले महिलाको नेतृत्व, सशक्तिकरण र स्थानीय पर्यटन प्रवर्द्धन गर्दै सांस्कृतिक परम्पराको संरक्षण गर्ने उद्देश्यले यो कार्यक्रम आयोजना गरेको जनाएको छ।

स्थानीय समुदायबीच आपसी सद्भाव, एकता र संस्कृतिप्रतिको गर्व वृद्धि गर्ने अवसरका रूपमा योमरी महोत्सव महत्वपूर्ण बनेको सहभागीहरूले बताएका छन्।