काठमाडौं। प्रहरी महानिरीक्षक (आईजीपी) दानबहादुर कार्कीले महिला तथा बालबालिकामाथि बढ्दो हिंसाका तथ्याङ्कले सबैलाई गम्भीर ढंगले सोच्न बाध्य बनाएको बताउँदै यस्ता अपराध रोकथामका लागि सामूहिक प्रयास अपरिहार्य रहेको बताएका छन्। नेपाल प्रहरी प्रधान कार्यालयमा आइतबार आयोजित ‘लैङ्गिक हिंसा विरुद्ध १६ दिने अभियान’को विशेष समारोहलाई सम्बोधन गर्दै उनले प्रविधिको दुरुपयोगले नयाँ चुनौती थपिएको र लैङ्गिक हिंसा अन्त्यका लागि सबै तह–तप्काबाट समन्वित सहकार्य आवश्यक रहेको उल्लेख गरे।

वार्षिक तथ्यपत्र सार्वजनिक

समारोहका क्रममा आइजीपी कार्कीले आर्थिक वर्ष २०८१/८२ को ‘लैङ्गिक हिंसाको वार्षिक तथ्यपत्र’ सार्वजनिक गरे। तथ्यपत्रमा नेपाल प्रहरीले वर्षभर लैङ्गिक हिंसा न्यूनीकरणमा गरेका गतिविधि, कारबाही र उपलब्धिहरू समेटिएका छन्। उनले लैङ्गिक हिंसा सम्बोधन बहुआयामिक विषय भएकाले यसका समाधानका लागि बहुआयामिक सहकार्य नै प्रभावकारी उपाय हुने स्पष्ट पारे।

उत्कृष्ट प्रहरीजनलाई सम्मान

लैङ्गिक हिंसा न्यूनीकरणमा उल्लेखनीय योगदान पुर्‍याउने प्रहरी कर्मचारीहरूलाई प्रशंसापत्र तथा नगद राशीसहित सम्मान गरिएको कार्यक्रमको विशेष आकर्षण थियो। आइजीपी कार्कीले पीडित सहायता, अनुसन्धान र रोकथाम कार्यमा देखाएको समर्पणप्रति कृतज्ञता व्यक्त गरे।

‘अभियान वर्षभर निरन्तर गर्नुपर्छ’

आईजीपी कार्कीले १६ दिने अभियानलाई केवल औपचारिक कार्यक्रमका रूपमा सीमित नराखी वर्षभरै उस्तै ऊर्जा र प्रतिबद्धतासहित लैङ्गिक हिंसाविरुद्ध काम गर्नुपर्नेमा जोड दिए। उनले स्थानीय तह, शैक्षिक संस्था, महिला संजाल र सरोकारवाला संघ–संस्थासँग सहकार्य गर्दै नेपाल प्रहरीले निरन्तर सचेतना कार्यक्रम सञ्चालन गरिरहेको जानकारी दिए।

एआइ र प्रविधिबाट नयाँ चुनौती

पछिल्लो समयमा कृत्रिम बुद्धिमत्ता (एआइ) र डिजिटल प्रविधिको दुरुपयोगमार्फत हिंसाका नयाँ रूप देखिन थालेको उल्लेख गर्दै प्रहरी प्रमुख कार्कीले यस्ता चुनौतीहरूको प्रभावकारी निगरानी र रोकथामका लागि प्रविधि–मैत्री संरचना तथा क्षमता विकास अत्यावश्यक भएको बताए। उनले महिला सुरक्षा र लैङ्गिक समानताप्रति नेपाल प्रहरी ‘शून्य सहनशीलता’को नीतिमा दृढ रहेको पुनः दोहोर्याए।

समारोहमा सरोकारवाला निकायका प्रतिनिधिहरू, राष्ट्रिय तथा अन्तर्राष्ट्रिय संस्थाका प्रतिनिधि र प्रहरी अधिकारीहरूको सहभागिता थियो।