काठमाडौँ । प्रधानमन्त्री सुशीला कार्कीले प्रविधिको प्रभावकारी प्रयोग र सकारात्मक सामाजिक व्यवहार परिवर्तनलाई लैंगिक हिंसा अन्त्यका लागि अत्यावश्यक पूर्वसर्त भएको बताउनुभएको छ।

प्रधानमन्त्री कार्कीले मंगलबार राष्ट्रिय नारा **‘प्रविधिको सही प्रयोग गरौँ : लैंगिक हिंसा अन्त्य गरौँ’**सहित सुरु भएको १६ दिने अभियान उद्घाटन गर्दै भनिन् कि जुनसुकै नाममा हुने हिंसाले कसैको हित नहुने स्पष्ट छ।

उनका अनुसार महिलामाथि बढी देखिने लैंगिक हिंसाबाट पुरुषसमेत प्रताडित हुने सामाजिक यथार्थ बुझिनु आवश्यक छ। प्रविधिको प्रयोगले सचेतना वृद्धि, सूचनामा पहुँच र प्रतिवेदन प्रणाली सुदृढ बनाउन मद्दत गर्ने भएकाले यस वर्षको नारा निकै सान्दर्भिक रहेको उनको भनाइ थियो।

प्रधानमन्त्री कार्कीले धर्म, संस्कृति वा परम्पराले महिलामाथि हिंसा गर्न समर्थन नदिने स्पष्ट पार्दै संविधान र कानुनले महिलालाई समान अधिकार दिएको भए पनि व्यावहारिक कार्यान्वयन अझै चुनौतीपूर्ण रहेको टिप्पणी गरिन्।

उहाँले निर्णय तहमा महिलाको प्रतिनिधित्व बढाउनुपर्ने र त्यसका लागि दलहरूले महिला उम्मेदवारलाई प्राथमिकता दिनुपर्नेमा जोड दिँदै भनिन्, “हिंसाले महिलाको जीवनमा मानसिकसहित बहु आयामिक चोट पुर्‍याउँछ; पीडितको संरक्षण, राहत र पुनःस्थापनालाई राज्यको प्राथमिकतामा राख्नुपर्छ।”

प्रधानमन्त्री कार्कीले प्रविधिको सही उपयोग, सशक्त कानुनी कार्यान्वयन र सकारात्मक सामाजिक व्यवहार परिवर्तनमार्फत लैंगिक हिंसा अन्त्य गर्न सबै पक्षलाई सक्रिय भूमिका निभाउन आह्वान गरिन्।