काठमाडौँ । दोलखाको मेलुङ गाउँपालिकाका अध्यक्ष र प्रमुख प्रशासकीय अधिकृत विरुद्ध अख्तियार दुरुपयोग अनुसन्धान आयोगमा उजुरी परेको छ । अध्यक्ष हिरा थोकर र प्रमुख प्रशासकीय अधिकृत सञ्जय शिवाकोटीविरुद्ध आयोगमा उजुरी दर्ता भएको हो ।

गाउँपालिकाको भवन निर्माणमा ठेकेदारसँग मिलेर उनीहरूले भ्रष्टाचार गरेको उजुरकर्ताको आरोप छ । असार २६ मा दर्ता भएको उजुरीको दर्ता नम्बर सी–०८३०२९ हो । उजुरीकर्ताले इन्जिनियर सञ्जु शिवाकोटी र सुमन नेपालमाथि पनि छानबिन गर्न माग गरेका छन् ।

निर्माण कम्पनीहरूसँग मिलेर गाउँपालिका अध्यक्षले ‘हिटिङ’ भन्ने क्राइटेरिया राखेर ठेक्का सम्झौता गरेको उजुरकर्ताले आरोप लगाएका छन् । गाउँपालिकाको ३ तले २० कोठे भवन गत वर्ष १२ करोडमा ठेक्का सम्झौता भएको थियो ।

चीनको उच्च हिमाली क्षेत्र र हिउँ परिरहने ठाउँमा मात्र भवनमा हिटिङ सिस्टमको क्राइटेरिया राख्ने गरिन्छ । सो सिस्टम अनुसार बटन थिचेपछि तात्ने प्रविधि जडान गरिएको हुन्छ । नेपालमा त्यस्तो विशेषताको लाइसेन्स भएका कम्पनीहरू नगन्य मात्रामा छन् ।

गाउँपालिका अध्यक्ष र प्रमुख प्रशासकीय अधिकृत मिलेर आफैँले चाहेको कम्पनीलाई ठेक्का सम्झौता दिने गरी क्राइटेरिया तयार गरेर आर्थिक लाभ लिएको उजुरकर्ताले आरोप लगाएका छन् । उजुरीबारे अख्तियारले छानबिन थालेको छ ।