बुढानीलकण्ठ । बुढानीलकण्ठ नगरपालिका वडा नं. ५ मा महिलाहरूको स्वास्थ्यलाई लक्षित गर्दै रजोनिवृत्ति (Menopause) सम्बन्धी एकदिने अभिमुखीकरण कार्यक्रम सम्पन्न भएको छ।

बुढानीलकण्ठ नगरपालिकाको जनस्वास्थ्य महाशाखाको आयोजनामा सम्पन्न कार्यक्रममा रजोनिवृत्तिको समयमा महिलामा देखिने शारीरिक तथा मानसिक परिवर्तन, सम्भावित स्वास्थ्य समस्या र तिनको व्यवस्थापनका उपायबारे विस्तृत जानकारी प्रदान गरिएको थियो।

कार्यक्रममा रजोनिवृत्तिका क्रममा देखिन सक्ने विभिन्न लक्षण, हर्मोनमा हुने परिवर्तन, निद्रामा समस्या, तनाव, चिडचिडापन तथा हड्डीको स्वास्थ्यमा पर्न सक्ने असरबारे जानकारी दिँदै स्वस्थ जीवनशैली अपनाउनुपर्नेमा जोड दिइएको थियो। साथै, सन्तुलित आहार, नियमित शारीरिक व्यायाम, पर्याप्त आराम, मानसिक स्वास्थ्यको ख्याल तथा आवश्यकताअनुसार स्वास्थ्यकर्मीसँग परामर्श लिनुपर्ने विषयमा समेत सहभागीलाई सचेत गराइएको थियो।

रजोनिवृत्ति महिलाको जीवनमा स्वाभाविक रूपमा आउने अवस्था भए पनि यस समयमा देखिने परिवर्तन र स्वास्थ्यसम्बन्धी समस्याबारे पर्याप्त जानकारी नहुँदा धेरै महिलाले असहजता भोग्नुपर्ने अवस्था रहेको छ। यस्तो अवस्थामा सही जानकारी, परिवारको सहयोग र समयमै स्वास्थ्य परामर्शले महिलाको जीवन सहज बनाउन महत्वपूर्ण भूमिका खेल्ने विषयमा कार्यक्रमले जोड दिएको थियो।

महिलाहरूलाई आफ्नो स्वास्थ्यप्रति सचेत बनाउने, रजोनिवृत्तिसम्बन्धी भ्रम तथा अनावश्यक डर हटाउने र आवश्यक स्वास्थ्य सेवा लिन प्रोत्साहित गर्ने उद्देश्यले आयोजित कार्यक्रमले समुदायस्तरमा महिला स्वास्थ्यसम्बन्धी जनचेतना अभिवृद्धि गर्न सहयोग पुग्ने अपेक्षा गरिएको छ।

नगरपालिकाको जनस्वास्थ्य महाशाखाले महिलाको स्वास्थ्य प्रवर्द्धन तथा स्वास्थ्यसम्बन्धी सचेतना विस्तारका लागि सञ्चालन गरेको यस कार्यक्रमले रजोनिवृत्तिको अवस्थालाई सहज रूपमा बुझ्न र आवश्यक स्वास्थ्य हेरचाहका उपाय अपनाउन महत्वपूर्ण योगदान पुर्‍याउने विश्वास गरिएको छ।