काठमाडौं । कुनै बालबालिकाका लागि पदक एउटा धातुको टुक्रा हुन सक्छ, तर त्यसको पछाडि लुकेको मेहनत, पसिना, संघर्ष र आत्मविश्वासको कथा निकै ठूलो हुन्छ।

खेलकुदको यही भावना बोकेर युनिटी तेक्वान्दो डोजाङले आगामी असोज २४ गते विशेष प्रदर्शन तथा प्रशिक्षण कार्यक्रम आयोजना गर्ने भएको छ।

गोकर्णेश्वर नगरपालिका–८ स्थित वी प्ले स्पोर्ट्स एरिनामा दिउँसो १२ बजेदेखि २ बजेसम्म सञ्चालन हुने कार्यक्रममा तेक्वान्दोको प्रशिक्षण तथा प्रदर्शन गरिनेछ।

प्रशिक्षक रामचन्द्र गोपाली र यमन श्रेष्ठको नेतृत्वमा अघि बढिरहेको प्रशिक्षण गतिविधिले बालबालिका तथा युवालाई शारीरिक रूपमा सक्रिय बनाउनुका साथै आत्मरक्षाको सीप सिक्ने अवसर प्रदान गर्ने उद्देश्य राखेको देखिन्छ।

अभिभावकले आफ्ना सन्तानलाई पढाइसँगै खेलकुदमा पनि सहभागी गराउन सके उनीहरूको सर्वाङ्गीण विकासमा सहयोग पुग्छ। खेलकुदले जित्न मात्र होइन, हार स्वीकार गर्न, पुनः प्रयास गर्न र आफ्नो क्षमतामाथि विश्वास गर्न पनि सिकाउँछ।

त्यसैले असोज २४ गतेको यो कार्यक्रम एउटा सामान्य खेल प्रदर्शनमा मात्र सीमित नरही बालबालिकाको प्रतिभा, अनुशासन र आत्मविश्वासलाई नजिकबाट बुझ्ने अवसर बन्न सक्छ।

कार्यक्रम : युनिटी तेक्वान्दो डोजाङको प्रदर्शन तथा प्रशिक्षण

स्थान : वी प्ले स्पोर्ट्स एरिना, गोकर्णेश्वर–८

मिति र समय : असोज २४, दिउँसो १२–२ बजे।