काठमाडौं । चक्रपथ सरसफाइ महाअभियानको ४९६औँ हप्ताको अवसरमा आयोजित १३औँ नियमित बृहत् रक्तदान कार्यक्रमबाट १०२ पिन्ट रगत संकलन गरिएको छ।

सरसफाइ र वातावरण संरक्षणलाई मूल उद्देश्य बनाएर निरन्तर अघि बढिरहेको चक्रपथ सरसफाइ महाअभियानले पछिल्लो समय सामाजिक सेवाका गतिविधिलाई समेत अभियानसँग जोड्दै आएको छ। त्यसैको निरन्तरताका रूपमा आयोजित रक्तदान कार्यक्रममा रक्तदाताहरूको उत्साहजनक सहभागिता देखिएको थियो।

रक्तदान केवल सामाजिक सेवा मात्र नभई आकस्मिक अवस्थामा बिरामीको जीवन जोगाउन महत्वपूर्ण सहयोग बन्ने भएकाले कार्यक्रमलाई मानवीय सेवाको अभियानका रूपमा हेरिएको छ। संकलित १०२ पिन्ट रगत आवश्यकतामा रहेका बिरामीका लागि उपयोगी हुने आयोजकको विश्वास छ।

नियमित रूपमा सरसफाइ अभियान सञ्चालन गर्दै आएको संस्थाले रक्तदानलाई समेत निरन्तरता दिनुले सार्वजनिक सरोकारका विषयमा नागरिक सहभागिताको दायरा फराकिलो बनाउन खोजेको देखिन्छ।

कार्यक्रम चक्रपथ सरसफाइ महाअभियानको आयोजनामा सम्पन्न भएको हो। ग्रिनसिटी हस्पिटल बसुन्धरा, हिमालयन वातावरण संरक्षण प्रा.लि. टोखा, यती हेल्थ साइन्स एकेडेमी, ब्रह्माकुमारी राजयोग उपसेवा केन्द्र रानीबारी, क्यानभास इन्टरनेसनल कलेज तथा ब्लोदान काठमाडौं मध्य क्षेत्र सहआयोजक रहेका थिए।

राष्ट्रिय खबर डटकम, तुफान न्युज डटकम र रोज नेपाल डटकमले मिडिया सहकार्य गरेका थिए। सोसल मिडिया एण्ड लिगल सर्भिसले कार्यक्रम व्यवस्थापन गरेको थियो।

कार्यक्रम संयोजन लोकबहादुर टण्डनले गरेका थिए भने व्यवस्थापन तिलक बस्नेत, मिडिया संयोजन डि.बि. पराजुली र प्राविधिक सहयोग मेट्रो ब्लड बैंक (मेट्रो हस्पिटल)ले गरेको थियो।

सरसफाइबाट सुरु भएको अभियानले रक्तदानजस्तो जीवनसँग प्रत्यक्ष जोडिएको सामाजिक सेवासम्म आफ्नो गतिविधि विस्तार गर्नुले नागरिक अभियानको प्रभाव क्षेत्र थप फराकिलो हुँदै गएको संकेत गरेको छ।