काठमाडौं । प्रतिनिधिसभाका सभामुख डोलप्रसाद अर्यालले साहित्य, कला तथा संस्कृति क्षेत्रको संरक्षण र प्रवर्द्धन गर्न आफू पूर्ण प्रतिबद्ध रहेको बताएका छन्।

नुर–गङ्गा प्रतिभा पुरस्कार गुठीद्वारा काठमाडौंमा आयोजित सम्मान तथा पुरस्कार समर्पण एवं कृति लोकार्पण समारोहलाई सम्बोधन गर्दै सभामुख अर्यालले साहित्य, कला र संस्कृति राष्ट्रका गहना भएकाले यसको संरक्षण तथा प्रवर्द्धनमा सबैको साझा भूमिका आवश्यक रहेको बताए।

‘साहित्य, कला र संस्कृति भनेका देशका गहना हुन्। यस क्षेत्रको संरक्षण तथा सम्वर्द्धन गर्न म सधैँ तयार छु,’ उनले भने।

नेपाली भाषा, साहित्य, कला र संस्कृतिका कारण नेपाल विश्वमा परिचित रहेको उल्लेख गर्दै सभामुख अर्यालले देशका प्रतिभाको खोजी, संरक्षण र सम्मान गर्नुपर्नेमा जोड दिए। ‘हाम्रा भाषा, साहित्य नै हाम्रो पहिचान हो। हामीले हाम्रा संस्कृतिको संरक्षण गर्नुपर्छ,’ उनले भने।

उनले मुलुकका विभिन्न स्थानमा रहेका तर अझै राष्ट्रियस्तरमा उजागर हुन नसकेका प्रतिभा तथा साहित्यकारको खोजी गरी उनीहरूको योगदानलाई व्यापक रूपमा चिनाउनुपर्ने धारणा व्यक्त गरे।

कार्यक्रममा नुर–गङ्गा प्रतिभा पुरस्कार गुठीका अध्यक्ष प्रा. डा. गोविन्द नेपालले गुठीले नेपाली साहित्य क्षेत्रमा योगदान पुर्‍याउने स्रष्टालाई नियमित रूपमा सम्मान तथा पुरस्कृत गर्दै आएको जानकारी दिए। उनले नेपाली साहित्यको विकास तथा प्रवर्द्धनका लागि गुठी निरन्तर सक्रिय रहेको बताए।

कार्यक्रममा गुठीका कोषाध्यक्ष एवं सांसद विदुषी राणा, संरक्षक अमिरप्रताप जबरा, सल्लाहकार जानुकी राणा, निवर्तमान अध्यक्ष तथा सल्लाहकार प्रा. डा. चूडामणि बन्धुलगायतको सहभागिता थियो।

सो अवसरमा विभिन्न साहित्यिक विधामा योगदान पुर्‍याएका १० जना स्रष्टालाई नगद पुरस्कारसहित सम्मान गरिएको थियो।

सम्मानित तथा पुरस्कृत स्रष्टाहरूले साहित्य तथा लोकगीतका क्षेत्रमा आफूहरूले पुर्‍याएको योगदानको कदर गर्दै सम्मानित हुन पाउँदा खुसी व्यक्त गरे। उनीहरूले यस्ता पुरस्कार तथा सम्मानले नेपाली साहित्य र लोकसाहित्यको क्षेत्रमा नयाँ पुस्तालाई थप सिर्जनशील बन्न प्रोत्साहन मिल्ने विश्वास व्यक्त गरे।