काठमाडौं ।  अख्तियार दुरुपयोग अनुसन्धान आयोगले नेपाल नागरिक उड्डयन प्राधिकरण (क्यान)का तत्कालीन महानिर्देशक प्रदीप अधिकारीविरुद्ध विशेष अदालतमा भ्रष्टाचार र सम्पत्ति शुद्धीकरणसम्बन्धी छुट्टाछुट्टै मुद्दा दायर गरेको छ।

अख्तियारका अनुसार अधिकारीले ठेक्का प्रक्रियामा अनियमितता गरी ठेकेदारबाट घुस लिएको तथा उक्त रकम लुकाउन सम्पत्ति शुद्धीकरण गरेको आरोप लगाइएको छ। सोही प्रकरणमा निर्माण व्यवसायी तथा गायत्री निर्माण सेवाका प्रमुख प्रेमप्रकाश ढकाललाई पनि प्रतिवादी बनाइएको छ।

अनुसन्धानबाट अधिकारीले क्यानको महानिर्देशकका रूपमा कार्यरत रहँदा विभिन्न ठेक्का स्वीकृत, अनुगमन तथा भुक्तानी प्रक्रियामा सहजीकरण गरेबापत ढकालबाट १ करोड ७१ लाख रुपैयाँ घुस लिएको आरोप अख्तियारले लगाएको छ।

अख्तियारका अनुसार घुसबापत प्राप्त रकम लुकाउन अधिकारीले ललितपुर महानगरपालिका–५ मा श्रीमतीको नाममा जग्गा खरिद गरेका थिए। जग्गा खरिद गर्दा सरकारी लिखतमा ९१ लाख रुपैयाँ मात्र मूल्य उल्लेख गरी वास्तविक कारोबार रकम लुकाइएको दाबी गरिएको छ।

आयोगले अवैध स्रोतबाट प्राप्त रकमलाई वैध देखाउने उद्देश्यले सरकारी कागजातमा गलत विवरण पेश गर्ने तथा बैंक खातामार्फत अस्वाभाविक वित्तीय कारोबार गरी सम्पत्ति शुद्धीकरणको कसुरसमेत गरेको आरोप लगाएको छ।

अख्तियारले अधिकारी र ढकाल दुवैविरुद्ध १ करोड ७१ लाख रुपैयाँ बिगो कायम गर्दै सोहीबराबर जरिवाना तथा कैद सजायको माग गरेको छ। साथै, घुसबाट खरिद गरिएको दाबी गरिएको ललितपुरस्थित जग्गा जफत गर्न पनि विशेष अदालतसमक्ष मागदाबी गरिएको छ।

उक्त आरोपहरू अख्तियारले विशेष अदालतमा दायर गरेको अभियोगपत्रमा आधारित हुन्। मुद्दाको अन्तिम निर्णय अदालतको सुनुवाइपछि हुनेछ।