भरतपुर, चितवन । राष्ट्रिय स्वतन्त्र पार्टी (रास्वपा) को प्रथम महाधिवेशन जारी रहँदा नयाँ नेतृत्व चयन प्रक्रिया थप रोचक बन्दै गएको छ। विशेषगरी महामन्त्री पदका लागि आकांक्षीहरूको संख्या धेरै भएपछि पार्टीभित्र तीव्र प्रतिस्पर्धा देखिएको छ भने शीर्ष नेतृत्वलाई सहमति जुटाउन चुनौती थपिएको छ।

रास्वपाको नयाँ विधानअनुसार दुई जना महामन्त्री रहने व्यवस्था गरिएको छ। तर उक्त पदका लागि वर्तमान महामन्त्रीहरू कवीन्द्र बुर्लाकोटी र भूपदेव शाहसँगै प्रवक्ता मनिष झा, शिशिर खनाल, विपिन आचार्य, गणेश पराजुली, यज्ञमणि न्यौपाने तथा लीमा अधिकारीलगायतका नेताहरूले दाबेदारी प्रस्तुत गरेका छन्। सीमित पदमा धेरै आकांक्षी देखिएपछि नेतृत्व चयन प्रक्रिया पेचिलो बनेको हो।

पार्टीभित्र महामन्त्री पदलाई लिएर विभिन्न समूहबीच आन्तरिक छलफल र शक्ति सन्तुलनको प्रयास जारी रहेको स्रोतहरूको भनाइ छ। विशेषगरी प्रवक्ता मनिष झाले आफू निर्वाचन प्रक्रियाबाट पछि नहट्ने स्पष्ट संकेत गरेपछि सहमतिका प्रयास थप जटिल बनेका छन्।

महाधिवेशनलाई सहमतिमार्फत नेतृत्व चयन गर्ने दिशामा लैजान शीर्ष नेतृत्व सक्रिय देखिए पनि विभिन्न राजनीतिक पृष्ठभूमिबाट आएका नेताहरूको व्यवस्थापन चुनौतीपूर्ण बनेको छ। वरिष्ठ नेता बालेन्द्र शाह निकट मानिने भूपदेव शाहको व्यवस्थापनलाई लिएर पनि नेतृत्व तहमा गम्भीर छलफल भइरहेको बताइएको छ।

पार्टीले निर्वाचनका लागि विद्युतीय मतदान प्रणालीको तयारी पूरा गरिसकेको छ। यद्यपि, सकेसम्म सर्वसम्मत नेतृत्व चयन गर्ने प्रयास जारी रहेकाले महाधिवेशनको बन्दसत्र सञ्चालनमा समेत केही ढिलाइ भएको छ।

देशभरबाट आएका प्रतिनिधिहरू नेतृत्व चयन प्रक्रियालाई चासोका साथ नियालिरहेका छन्। महामन्त्री पदमा देखिएको तीव्र प्रतिस्पर्धाले रास्वपाको आन्तरिक लोकतन्त्र, शक्ति सन्तुलन र आगामी राजनीतिक दिशाको संकेत गर्ने विश्लेषण गरिएको छ।

रास्वपाको पहिलो महाधिवेशनले नयाँ नेतृत्व चयनसँगै पार्टीको भावी कार्यदिशा, संगठनात्मक संरचना र राजनीतिक रणनीति तय गर्ने अपेक्षा गरिएको छ। महामन्त्री पदमा कसले बाजी मार्छ भन्ने विषय अहिले महाधिवेशनको सबैभन्दा चर्चित र चासोको केन्द्र बनेको छ।