काठमाडौँ ।  काठमाडौँ इन्स्टिच्युट अफ चाइल्ड हेल्थ (किओच) अन्तर्गत बाल अस्पतालको नवनिर्मित पश्चिमतर्फको अत्याधुनिक भवन औपचारिक रूपमा हस्तान्तरण गरिएको छ। बूढानीलकण्ठ नगरपालिका–७, हेपाली हाइटमा रहेको उक्त भवन समाजसेवी तथा व्यवसायी मीनबहादुर गुरुङ, सावित्री गुरुङ, पहलमान गुरुङ र सरला गुरुङको सहयोगमा निर्माण गरिएको हो।

भाटभटेनी उद्योग वाणिज्य समूहद्वारा रु ७१ करोड ४ लाख ४२ हजार २४४ को लागतमा निर्माण सम्पन्न गरिएको उक्त भवनको उद्घाटन जगद्गुरु शङ्कराचार्य श्री विधुशेखर भारतीले एक भव्य समारोहका बीच गर्नुभएको थियो।

कार्यक्रममा व्यवसायी मीनबहादुर गुरुङले अस्पताल भवनको साँचो जगद्गुरु शंकराचार्यमार्फत् अस्पतालका अध्यक्ष तथा वरिष्ठ मुटुरोग विशेषज्ञ प्रा.डा. भगवान कोइरालालाई हस्तान्तरण गर्नुभएको थियो।

“विपन्न बालबालिकाले सहज उपचार पाउने वातावरण बनेको छ” — सुशीला कार्की

भवन उद्घाटन तथा हस्तान्तरण कार्यक्रममा बोल्दै पूर्वप्रधानन्यायाधीश सुशीला कार्कीले किओच बाल अस्पतालको स्थापना नेपाली स्वास्थ्य क्षेत्रमा अत्यन्त सकारात्मक र ऐतिहासिक कदम भएको बताउनुभयो।

उहाँले आर्थिक रूपमा कमजोर तथा विपन्न परिवारका बालबालिकाले अब सहज र सुलभ रूपमा विशिष्टीकृत स्वास्थ्य सेवा प्राप्त गर्ने वातावरण बनेको उल्लेख गर्नुभयो।

उहाँले भन्नुभयो,

“नेपालमा अझै धेरै परिवार आर्थिक अभावकै कारण आफ्ना बालबालिकाको उचित उपचार गराउन सकिरहेका छैनन्। यस्तो अवस्थामा किओचजस्तो संस्था स्थापना हुनु आफैंमा ठूलो सामाजिक अभियान हो।”

“बालबालिकाको उपचारमा गुणस्तरीय सेवा प्राथमिकतामा” — डा. भगवान कोइराला

अस्पतालका अध्यक्ष एवं वरिष्ठ मुटुरोग विशेषज्ञ प्रा.डा. भगवान कोइरालाले किओच गैरनाफामूलक संस्थाका रूपमा सञ्चालन भइरहेको उल्लेख गर्दै बालबालिकाको उपचारमा उच्च गुणस्तर र विशिष्टीकृत सेवालाई प्राथमिकता दिइने स्पष्ट पार्नुभयो।

उहाँले बाल स्वास्थ्य सेवा नेपालको सबैभन्दा संवेदनशील क्षेत्रमध्ये एक भएको उल्लेख गर्दै देशमै आधुनिक र विशेषज्ञ सेवा उपलब्ध गराउने उद्देश्यसहित अस्पताल स्थापना गरिएको बताउनुभयो।

उहाँले भन्नुभयो,

“हामी कुनै व्यावसायिक नाफाभन्दा पनि बालबालिकाको जीवन बचाउने उद्देश्यले काम गरिरहेका छौँ। अब नेपाली बालबालिका सामान्य उपचारका लागि विदेश धाउनुपर्ने अवस्था अन्त्य गर्नुपर्छ भन्ने हाम्रो लक्ष्य हो।”

“सर्वसाधारणले गुणस्तरीय स्वास्थ्य सेवा पाऊन् भन्ने उद्देश्य” — मीनबहादुर गुरुङ

भवन निर्माणकर्ता व्यवसायी मीनबहादुर गुरुङले समाजप्रतिको उत्तरदायित्व अन्तर्गत अस्पताल निर्माणमा सहयोग गरिएको बताउनुभयो।

उहाँले सर्वसाधारण नागरिक, विशेष गरी बालबालिकाले गुणस्तरीय स्वास्थ्य सेवा पाउनुपर्ने उद्देश्यले सहयोग गरेको उल्लेख गर्नुभयो।

उहाँले भन्नुभयो,

“धन सम्पत्ति समाजकै लागि हो। यदि यसले बालबालिकाको जीवन बचाउन र अभिभावकको आँसु पुछ्न सक्छ भने त्योभन्दा ठूलो सन्तुष्टि अरू केही हुन सक्दैन।”

सातै प्रदेशमा बाल अस्पताल विस्तारको अभियान

काठमाडौँ इन्स्टिच्युट अफ चाइल्ड हेल्थ (किओच) देशकै अग्रणी गैरसरकारी सामाजिक संस्थामध्ये एक हो। यो संस्था मुनाफारहित कम्पनीका रूपमा दर्ता भई समाज कल्याण परिषद्मा आबद्ध रहेको छ।

देशभरका बालबालिकालाई गुणस्तरीय स्वास्थ्य सेवा उपलब्ध गराउने, बाल मृत्युदर घटाउने तथा बाल स्वास्थ्य क्षेत्रमा विशिष्टीकृत सेवा विस्तार गर्ने मुख्य उद्देश्यका साथ संस्था स्थापना गरिएको हो।

किओचले काठमाडौँ उपत्यकामा अत्याधुनिक केन्द्रीय बाल अस्पताल सञ्चालन गर्नुका साथै सातै प्रदेशमा बाल अस्पताल सञ्जाल निर्माणको अभियानलाई तीव्रता दिएको जनाएको छ।

अस्पताल प्रशासनका अनुसार भविष्यमा अत्याधुनिक उपकरण, विशेषज्ञ चिकित्सक तथा बालमैत्री स्वास्थ्य सेवामार्फत नेपाललाई दक्षिण एसियाकै उत्कृष्ट बाल स्वास्थ्य सेवा केन्द्रका रूपमा विकास गर्ने लक्ष्य लिइएको छ।