काठमाडौँ । हाम्रो भान्सामा दैनिक प्रयोग हुने लसुन स्वाद बढाउने मसला मात्र होइन, स्वास्थ्यका लागि अत्यन्त लाभदायक प्राकृतिक औषधि पनि हो। आयुर्वेददेखि आधुनिक चिकित्सा विज्ञानसम्मले लसुनलाई बहुगुणी खाद्य पदार्थका रूपमा व्याख्या गरेका छन्। विशेषगरी, बिहान खाली पेटमा काँचो लसुन सेवन गर्नु स्वास्थ्यका लागि निकै उपयोगी मानिन्छ।

लसुनमा ‘एलिसिन’ (Allicin) नामक सक्रिय तत्व पाइन्छ, जसमा शक्तिशाली एन्टिब्याक्टेरियल, एन्टिभाइरल र एन्टिफंगल गुणहरू हुन्छन्। यही कारणले लसुनले शरीरलाई विभिन्न संक्रमण र रोगबाट जोगाउन महत्वपूर्ण भूमिका खेल्छ।

रोग प्रतिरोधात्मक क्षमता बढाउँछ

बिहान खाली पेटमा काँचो लसुन खाने बानीले शरीरको रोगसँग लड्ने क्षमता (इम्युनिटी) बलियो बनाउँछ। नियमित सेवनले रुघाखोकी, फ्लू, भाइरल ज्वरो तथा मौसमी संक्रमणबाट बच्न सहयोग पुग्छ। शरीरमा रोगको संक्रमण भइहाले पनि छिटो निको हुन मद्दत मिल्ने स्वास्थ्य विज्ञहरूको भनाइ छ।

रक्तचाप नियन्त्रणमा सहयोग

लसुनले रक्तनलीहरूलाई फैलाउन मद्दत गर्ने भएकाले उच्च रक्तचाप नियन्त्रणमा उपयोगी मानिन्छ। नियमित सेवनले रक्तसञ्चार सुधार गरी मुटुसम्बन्धी जोखिम कम गर्न सहयोग पुर्‍याउँछ।

मुटुको स्वास्थ्यका लागि लाभदायक

काँचो लसुनले खराब कोलेस्ट्रोल कम गर्न र रगत जम्ने सम्भावना घटाउन मद्दत गर्छ। यसले मुटुलाई स्वस्थ राख्न महत्वपूर्ण भूमिका खेल्ने विभिन्न अध्ययनहरूले देखाएका छन्।

पाचन प्रणाली बलियो बनाउँछ

खाली पेटमा लसुन खाँदा पेटमा रहेका हानिकारक ब्याक्टेरियाहरू नष्ट हुन मद्दत मिल्छ। यसले पाचन प्रक्रिया सुधार गरी पेटसम्बन्धी समस्याबाट राहत दिन सक्छ।

कसरी खाने ?

स्वास्थ्य विज्ञहरूका अनुसार बिहान खाली पेटमा लसुनको १ वा २ वटा साना पोटी हल्का कुटेर वा चपाएर मनतातो पानीसँग खानु उत्तम मानिन्छ। लसुन कुटेर केही मिनेट राखेपछि त्यसमा रहेको ‘एलिसिन’ तत्व अझ सक्रिय हुने बताइन्छ।

सावधानी पनि आवश्यक

काँचो लसुन अत्यधिक मात्रामा सेवन गर्दा पेट पोल्ने, ग्यास्ट्रिक हुने वा मुख गन्हाउने समस्या हुन सक्छ। अल्सर भएका व्यक्ति तथा रगत पातलो गर्ने औषधि सेवन गरिरहेकाहरूले भने चिकित्सकको सल्लाह लिएर मात्र लसुन सेवन गर्नु उपयुक्त हुन्छ।

स्वास्थ्यका लागि फाइदाजनक भए पनि कुनै पनि कुरा सन्तुलित मात्रामा सेवन गर्नु नै सबैभन्दा महत्वपूर्ण मानिन्छ।