चितवन । अण्डाको मूल्यमा उल्लेखनीय गिरावट आएको छ, जसका कारण कुखुरा पालक किसानहरू गम्भीर संकटमा परेका छन्। नेपाल लेयर्स कुखुरा पालक सङ्घले सोमबारदेखि लागू हुने गरी तोकेको नयाँ समर्थन मूल्यअनुसार ठूलो अण्डा प्रतिक्रेट ३७५ रुपैयाँ र मध्यम अण्डा ३३५ रुपैयाँ कायम गरिएको छ।

यसअघि गत मङ्सिर महिनामा अण्डाको मूल्य हालसम्मकै उच्च बिन्दुमा पुग्दै प्रतिक्रेट ५६५ रुपैयाँ पुगेको थियो। तर हाल उत्पादन बढ्नुका साथै भारतबाट सस्तो सेतो अण्डा आयात भएर बजारमा छिरिनु मूल्य गिरावटको मुख्य कारण बनेको सङ्घले जनाएको छ।

सङ्घका अनुसार हाल अण्डा उत्पादनको लागत मूल्य प्रतिक्रेट करिब ५७४ रुपैयाँ पर्न आउँछ। तर बजार मूल्य लागतभन्दा धेरै कम भएपछि किसानहरू घाटा सहेर अण्डा बिक्री गर्न बाध्य भएका छन्, जसले उनीहरूलाई निराश बनाएको छ।

यस अवस्थालाई ध्यानमा राख्दै सङ्घले भारतीय अण्डाको आयात तत्काल रोक्न सरकारसँग माग गरेको छ। अन्यथा स्वदेशी कुखुरा व्यवसाय धराशायी हुने खतरा बढ्दै जाने सङ्घको चेतावनी छ।