शिव शक्ति स्वास्थ्य क्लिनिक ग्रामीण क्षेत्रमा सर्वसाधारण जनतालाई सुलभ रुपमा आधारभूत स्वास्थ्य सेवा उपलब्ध गराउने पवित्र उद्देश्यसाथ स्थापित भएको संस्था हो । यस संस्थाबारे पछिल्लो केही समययता विभिन्न सञ्चारमाध्यममार्फत संप्रेषित समाचारबारे हाम्रो गम्भीर ध्यानाकर्षण भएकोले निम्न बुँदाहरुमार्फत हाम्रो भएको यथार्थ स्पष्ट पार्न चाहन्छौं ।
१.दर्ता सम्बन्धमा :
यस शिवशक्ति स्वास्थ्य क्लिनिक प्रा.लि. कम्पनी रजिष्टारको कार्यालय,आन्तरिक राजश्व कार्यालय,औषधि व्यवस्था विभाग र मेलम्ची नगर पालिका वडा नं.११ मा दर्ता रही सञ्चालन हुँदै आएको छ ।
२. गर्भपतन सेवा सम्बन्धमा :  यस शिवशक्ति स्वास्थ्य क्लिनिक नेपाल सरकारका कानून, नियम र विधिप्रति प्रतिवद्ध रहेको छ । यहाँबाट कुनै पनि प्रकारको गर्भपतनसम्बन्धी सेवा प्रवाह गरिदैन र गरिएको छैन ।
३. प्रचारित घटना सम्बन्धमा : मिति २०८२।०७।०६ गते तिहारको भाइटीकाको दिन हो । त्यस दिन क्लिनिकमा प्राय सबै स्टाफहरु बिदामा थिए । उक्त दिन क्लिनिकमा कार्यरत अ.न.मी. शान्ता ढकाल, भान्से धनबहादुर र फर्मासिष्ट एक जना मात्रै सेवामा थिए । त्यस दिन दिउँसो अबेर तिर दुई जना महिला आमा र छोरी अ.न.मी. शान्ता ढकाललाई खोज्दै आएका रहेछन् ।आमाले शान्ता ढकाललाई मेरो छोरीलाई पेट दुखेर खपी नसक्नु भएको छ एक पटक हेरी दिनुपर्यो भनेपछि भित्र लगेर हेर्दा सुत्केरी व्यथा लागेको र बच्चाको टाउको समेत निस्किसकेको अवस्था थियो । केहीबेरमै बच्चा जन्मियो । बच्चा जन्माउने व्यक्ति अविवाहित रहिछिन् । अभिभावकले बच्चा लिएर घरमा जाँदैनौ , हामी बच्च लाँदैनौ भन्न थालेपछि अ.न.मी. शान्ता ढकालले बच्चाको ज्यानको असुरक्षा महसुस गरी अभिभावकको जिम्मा नदिई बच्चा आफैसँग राखेकी रहिछिन् । स्थानीयले बच्चाबारे पहिले प्रहरीलाई खबर गर्न सुझाव दिएपछि निज अ.न.मी.शान्ता ढकालले नै प्रहरीलाई खबर गरेकी हुन् । लगत्तै प्रहरी सो स्थानमा पुगी सोधपुछ गरी फर्किएको हो । भोलीपल्ट बिहानै प्रहरी चौकीमा पुगेर नवजात शिशुलाई आमाको जिम्मा लगाईएको हो । अविवाहित आमाबाट जन्मिएको बच्चा अभिभावकबाटै असुरक्षित हुने देखिएपछि प्रहरी र बालआश्रमकै सुझाव अनुसार आमा र बच्चालाई माइती नेपालको जिम्मा लगाइएको छ । हाल उनीहरु माइती नेपालमा सकुशल छन् ।
४. अ.न.मी.शान्ता ढकालबारे :  शिवशक्ति स्वास्थ्य क्लिनिक प्रा.लि.मा कार्यरत शान्ख्ता ढकाल दक्ष प्रसुतिकर्मी तालिम प्राप्त जनशक्ति हुन् । क्लिनिकमा आकस्मिक रुपमा आएकी बिरामीको आकस्मि व्यवस्थापन गर्दा बच्चा जन्मन पुगेको हो । दक्ष प्रसुतिकर्मीकै सहयोगले बच्च सकुशल जन्मन सम्भव भएको हो । यसबारे बच्चाकी आमासँग थप बुझ्न सकिन्छ नै । सार्वजनिक बिदाको दिन , चिकित्सव बिदामा भएको बेला आकस्मिक स्वास्थ्य सहयोग गर्दा बच्च जन्मिन पुगेको यथार्थलाई नबुझी चिकित्सक समेतको नाम जोडेर आएका सूचनाप्रति क्लिनिक दुःख व्यक्त गर्दछ । यसबारेमा समाचार लेख्दा क्लिनिक पक्षको भनाई पनि पूर्ण रुपमा आएको भए सन्तुलन हुने थियो भन्ने हाम्रो धारणा छ । समाचारमा उल्लेखित कतिपय विवरणहरु सत्य होइनन् भन्ने जानकारी हाम्रा शुभचिन्तक, आम सर्वसाधारण र सेवाग्रहरीलाई अवगत गराउन चाहन्छौं ।
शिवशक्ति स्वास्थ्य क्लिनिक प्रा.लि. मेलम्ची ११, सिन्धुपाल्चोक ।

अ.न.मी. शान्ता ढकालको भनाई
म अ.न.मी शान्ता ढकाल शिव शक्ति स्वास्थ क्लिनिक मेलम्चीमा कार्यरत छु २०८२÷७ ÷६ गतेको दिन भाइ टिकाको दिन सार्वजनिक बिदा थियो । सो दिन क्लिनिकमा अन्य कर्मचारी नभएको र मेरो घर नजिक भएको हुनाले म क्लिनिकमै थिए । त्यही बेला २ जना महिला आउनुभयो । उहाँहरु आमा छोरी हुनुहुँदो रहेछ । सो क्रममा छोरीलाई निकै पेट दुखेकोले हेरिदिन अनुरोध गर्नुभयो । क्लिनिक भित्र लगेर बेडमा सुताएर हेर्दा प्रसुति व्यथा लागेको रहेछ । बच्चाको टाउको निस्किसकेको अवस्था थियो । अन्यत्र पठाउन आमा छोराकै ज्यानलाई जोखिम हुने थियो । दक्ष प्रसुतिकर्मीसमेत भएकाले कामको धर्म अनुसार मैले सहयोग गरेकी हुँ । सो क्रममा २० मिनेटमा बच्चाको सकुशल जन्म भयो । आमा पनि सुरक्षित भइन् । सोही क्रममा उनीहरुले नवजात शिशु घर नलाने जिद्धी लिए । बिहे नभएकी छोरीले बच्चा पाएको हुँदा घर लैजान नसक्ने , बरु कतै फाल्दिन्छौं भनेपछि बच्चाको ज्यान असुरक्षित हुनसक्ने ठानेर मैले आफै पाल्छु भनेर राखेकी हुँ । मानवीय हिसाबले मैले बच्चाको ज्यान बचाउन प्रयास गरे । सोही क्रममा नगरपालिकमा फोन गर्दा बिदाको दिन भएकाले उठेन । घर नजिकैको बाल आश्रमको सरलाई बच्चा राखिदिन अनुरोध गरे । पछि प्रहरीमा खबर गरी प्रहरी आएपछि सल्ला अनुसार नै २०८२÷७ ÷१० गते बिहान सुत्केरी आमा छोरी लिएर प्रहरी चौकी गए । प्रहरीलाई आमा र बच्चा जिम्मा लगाइदिए । यसबाहेक अन्य केही भएको होइन । प्रहरीले मलाई आवश्यक परे बोलाउला भन्नुभएको थियो । अचानक मिडियामा विभिन्न कुराहरु आए । मैले पवित्र उद्देश्यले बिरामीको सेवा र नवजात शिशुको ज्यानको रक्षा गरेकी हुँ । मेरो धारणा कतै पनि आएन । आमा र बच्चा दुवै स्वस्थ हुनु कसरी गर्भपतन हुन्छ ? कसरी अनैतिक काम हुन्छ ? म आफै एक दक्ष प्रसुतिकर्मी भएकाले आपतकालीन अवस्थामा आकस्मिक रुपमा बिरामीलाई सेवा दिएको मात्रै हुँ । यसबाहेक अन्य कुनै कसुर मबाट भएको छैन ।

नोट : शिवशक्ति स्वास्थ्य क्लिनिक प्रा.लि. मेलम्ची ११, सिन्धुपाल्चोकबाट पठाएको भनाइ जस्ताको तस्तै छापिएको हो