बीबीसी । विश्वप्रसिद्ध चिप निर्माता कम्पनी एनभिडियाका प्रमुख कार्यकारी अधिकृत (सीईओ) जेन्सेन ह्वाङ निजी सम्बन्धसम्बन्धी विवादमा तानिएको समाचार सार्वजनिक भएको छ। उनीसँग जोडिएका दुईवटा विवाहबाहिरका सम्बन्धबारे आएका दाबीपछि कम्पनीको सञ्चालक समितिले उनको नेतृत्वबारे छलफल गर्न बैठक बोलाएको दाबी गरिएको छ।

अमेरिकी प्रविधि पत्रकार काली हेजले ‘वाल स्ट्रिट जर्नल’ र ‘फाइनान्सियल टाइम्स’का प्रतिवेदनलाई उद्धृत गर्दै यसबारे समाचार सार्वजनिक गरेकी हुन्। ती प्रतिवेदनमा चीनका लागि जासुसी गरेको आशङ्का गरिएकी एक महिलासँग ह्वाङको सम्बन्ध रहेको दाबी गरिएको छ। यद्यपि, उक्त आरोप र सम्बन्धबारे स्वतन्त्र पुष्टि भएको विवरण प्रस्तुत गरिएको छैन।

यस विषयमा ह्वाङले निजी कुराकानीमा ती महिलाले बेइजिङलाई सूचना दिइरहेको आफूलाई जानकारी नभएको बताएको र अमेरिकी राष्ट्रपति डोनाल्ड ट्रम्पलाई समेत यही कुरा जानकारी गराएको समाचारमा उल्लेख छ।

यसैबीच, कम्पनीकै एक कर्मचारीसँग पनि ह्वाङको सम्बन्ध रहेको अर्को दाबी सार्वजनिक भएको छ। उक्त दाबी पुष्टि भएमा कम्पनीको सञ्चालक समितिका लागि विषयलाई बेवास्ता गर्न कठिन हुने विश्लेषण गरिएको छ। प्रविधि क्षेत्रका एक जानकारले बीबीसीसँग कुरा गर्दै यस विवादले ह्वाङको नेतृत्वमाथि प्रश्न उठाउन सक्ने बताएका छन्।

जेन्सेन ह्वाङ एनभिडियाको अभूतपूर्व सफलताका प्रमुख सूत्रधारमध्ये एक मानिन्छन्। आर्टिफिसियल इन्टेलिजेन्स (एआई) प्रविधिको विकास र विस्तारमा आवश्यक पर्ने कम्प्युटर चिप उत्पादन गर्ने एनभिडिया विश्वकै अग्रणी कम्पनीमध्ये एक हो। एआई औजार तथा ठूला भाषा मोडेल सञ्चालन गर्न आवश्यक सेमिकन्डक्टर निर्माणमा कम्पनीको महत्त्वपूर्ण भूमिका छ।

व्यवसाय पत्रकार ओस्मन्ड चियाका अनुसार ह्वाङ एआई प्रतिस्पर्धाको केन्द्रमा रहेको कम्पनीका नेतृत्वकर्ता हुन्। उनले डिजाइन गर्ने चिपले आधुनिक एआई प्रविधिलाई सञ्चालन गर्न महत्त्वपूर्ण भूमिका खेलिरहेको छ।

युवा इन्जिनियरका रूपमा ह्वाङले सन् १९९३ मा एनभिडियाको सह–स्थापना गरेका थिए। भिडियो गेमका लागि चिप उत्पादनबाट व्यवसाय सुरु गरेको कम्पनीलाई उनले पछि एआई विकासका लागि आवश्यक सेमिकन्डक्टर उत्पादनतर्फ केन्द्रित गरे। त्यसपछि एनभिडिया बहु–ट्रिलियन डलरको कम्पनीका रूपमा विस्तार भएको हो।

ह्वाङ एनभिडियाको सार्वजनिक अनुहारका रूपमा परिचित छन्। प्रविधि क्षेत्रमा उनका प्रशंसक ठूलो सङ्ख्यामा छन्। ताइवानमा उनलाई मायाले ‘ड्याडी ह्वाङ’ भन्ने गरिन्छ भने कतिपयले उनको लोकप्रियतालाई गायिका टेलर स्विफ्टसँग तुलना गर्ने गरेका छन्।

ब्लूमबर्ग बिलियनेर्स इन्डेक्सलाई उद्धृत गर्दै समाचारमा ह्वाङको अनुमानित खुद सम्पत्ति १५५ अर्ब अमेरिकी डलर अर्थात् करिब ११५ अर्ब पाउन्ड रहेको उल्लेख गरिएको छ।