काठमाडौँ । नेपाली मौलिक संस्कृति, परम्परा र सामाजिक सद्भावको संरक्षण तथा प्रवर्द्धन गर्ने उद्देश्यले वृक्षालय रिसोर्ट कपनको आयोजना र सोसल मिडिया एण्ड लिगल सर्भिस प्रा.लि.को व्यवस्थापनमा आयोजित रमाइलो देउसी–भैलो तथा शुभकामना आदानप्रदान कार्यक्रम भव्य रूपमा सम्पन्न भएको छ।

२०८३ कार्तिक २१ गते शनिबार वृक्षालय रिसोर्ट कपनमा सम्पन्न कार्यक्रममा नेपाली मौलिक कला, संस्कृति र सांगीतिक क्षेत्रका कलाकारहरूको विविध प्रस्तुतिसँगै आत्मीय भेटघाट, शुभकामना आदानप्रदान तथा सम्मान कार्यक्रमसमेत आयोजना गरिएको थियो।

कार्यक्रममा सेलो गायक प्रविन्स मोक्तान, सर्जक तथा कलाकार बिजेन्द्र नौबागे, गायिका विष्णु परियार, गायक शिवराज गौतम, गायिका माया गुरुङ, गायिका सोनिका श्रेष्ठ, कलाकार तथा मोडल सुस्मिता श्रेष्ठ र बाल कलाकार पूर्णिका बी.के.ले आफ्ना सांगीतिक तथा कलात्मक प्रस्तुति दिएका थिए। उनीहरूका प्रस्तुतिले कार्यक्रमलाई सांगीतिक र सांस्कृतिक रौनक प्रदान गरेको थियो।

त्यसैगरी, रसुवाका गायक नोर्चेल तामाङले टुङ्ना बजाउँदै प्रस्तुत गरेको मौलिक सांगीतिक धुनले हिमाली लोकसंस्कृतिको सुन्दर झल्को दिएको थियो। आधुनिक सांगीतिक परिवेशमा मौलिक बाजा, भाका र लोकधुनको उपस्थिति आफैँमा सांस्कृतिक पहिचानप्रतिको सम्मान हो। यस्ता प्रस्तुतिले नयाँ पुस्तालाई आफ्नो मौलिक कला र परम्परासँग जोड्न महत्वपूर्ण भूमिका खेल्ने अपेक्षा गर्न सकिन्छ।

कार्यक्रममा वृक्षालय रिसोर्टका सञ्चालक तथा युवा व्यवसायी सुवास कुँवर, सोसल मिडिया एण्ड लिगल सर्भिस प्रा.लि.का अध्यक्ष डि.बि. पराजुली, सल्लाहकार विकास तामाङ तथा अभियन्ता लीला खनाललगायतको उपस्थिति रहेको थियो। कार्यक्रमको सहजीकरण युवा अभियन्ता मुकुन्द सिलवालले गरेका थिए।

त्यसैगरी, भ्रष्टाचारविरुद्ध नागरिक अभियानका अध्यक्ष अर्जुन के.सी., आगमन टोल सुधार समितिका अध्यक्ष शेखर खनाल, पत्रकार राजन थापा, पूर्व प्रहरी निरीक्षक तथा सर्जक गोविन्द प्रधान र ग्रील तथा स्टिल व्यवसायी संघ काठमाडौँका सक्रिय सदस्य रामचन्द्र नगरकोटीलगायत विभिन्न क्षेत्रका व्यक्तित्वहरूको सहभागिता रहेको थियो।

कार्यक्रमको अर्को महत्वपूर्ण पक्ष पाककलाको क्षेत्रमा योगदान पुर्‍याउँदै आएका दाउरा थकाली चुलोका कार्यकारी सेफ भरत सुनुवारलाई गरिएको सम्मान थियो। वृक्षालय रिसोर्ट कपनका तर्फबाट उहाँलाई सम्मान गर्दै पाककलामार्फत नेपाली खानाको मौलिक स्वाद, परम्परा र पहिचानलाई जीवन्त राख्न पुर्‍याएको योगदानको कदर गरिएको थियो।

त्यसैगरी, कार्यक्रमका सहयोगी खुसी इन्डस्ट्रिज नेपालको तर्फबाट मायाको चिनोस्वरूप माईती लिक्विड डिवास, पितम्बरी तथा साबुन प्रदान गरिएको थियो। कार्यक्रमलाई सफल बनाउन स्वयंसेवीका रूपमा दिपिका खनाल, शुभद्रा भुर्तेल र समीक्षा थापाले महत्वपूर्ण भूमिका निर्वाह गरेका थिए।

नेपाली समाजमा देउसी–भैलो केवल मनोरञ्जन वा दक्षिणा संकलन गर्ने माध्यमका रूपमा मात्र सीमित छैन। यसभित्र धार्मिक आस्था, पौराणिक आख्यान, सामाजिक सम्बन्ध, सामूहिक भावना, लोकभाका र पुस्तौँदेखि हस्तान्तरण हुँदै आएको सांस्कृतिक चेतना अन्तर्निहित छ। यमपञ्चकको धार्मिक महत्त्वदेखि बलिराजाको पौराणिक कथासम्म समेटिएको देउसी–भैलोले नेपाली समाजको सामूहिक स्मृति र सांस्कृतिक निरन्तरतालाई अभिव्यक्त गर्छ।

तर पछिल्लो समय तिहारको मौलिक देउसी–भैलो आधुनिक मनोरञ्जन, तडकभडक र औपचारिकतामा सीमित हुँदै गएको गुनासो पनि सुनिन्छ। परम्परागत भाका, स्थानीय बाजा, मौलिक शब्द र सामूहिक सहभागिताको स्थान क्रमशः अन्य स्वरूपले लिन थालेका छन्। यस्तो अवस्थामा मौलिक संस्कृतिलाई व्यवहारमै जोगाउने उद्देश्यसहित आयोजना गरिने कार्यक्रमहरूको महत्त्व अझ बढेर गएको छ।

वृक्षालय रिसोर्ट कपनमा आयोजित यस कार्यक्रमले संस्कृति संरक्षणको जिम्मेवारी कुनै एक समुदाय, संस्था वा पुस्ताको मात्र नभई सम्पूर्ण समाजको साझा दायित्व भएको सन्देश दिएको छ। व्यवसायिक संस्थाहरूले पनि आफ्नो सामाजिक उत्तरदायित्वलाई सांस्कृतिक संरक्षणसँग जोड्न सक्छन् भन्ने उदाहरणका रूपमा यसलाई लिन सकिन्छ।

विशेषगरी, कलाकार, व्यवसायी, सामाजिक अभियन्ता, पत्रकार तथा विभिन्न क्षेत्रका व्यक्तित्वलाई एउटै थलोमा जोडेर गरिएको यस प्रकारको आयोजनाले सामाजिक सम्बन्ध विस्तार गर्नुका साथै मौलिक कला र प्रतिभालाई प्रोत्साहन गर्ने अवसरसमेत सिर्जना गरेको छ।

संस्कृति पुस्तौँको अनुभव, अभ्यास र पहिचानबाट निर्माण हुने अमूल्य सम्पत्ति हो। यसलाई भाषणमा मात्र सीमित नराखी व्यवहारमा उतार्न आवश्यक छ। घरआँगनमा गुञ्जिने मौलिक देउसीका भाका, टुङ्नाको धुन, लोकगीतका शब्द र आपसी सद्भावका सम्बन्धलाई जीवन्त राख्न सके मात्र भावी पुस्ताले आफ्नो सांस्कृतिक जरा पहिचान गर्न सक्नेछन्।

यस अर्थमा वृक्षालय रिसोर्ट कपनको आयोजना तथा सोसल मिडिया एण्ड लिगल सर्भिस प्रा.लि.को व्यवस्थापनमा सम्पन्न देउसी–भैलो तथा शुभकामना आदानप्रदान कार्यक्रम एउटा सांगीतिक जमघटमा मात्र सीमित रहेन; यसले मौलिक संस्कृति, सामाजिक एकता र प्रतिभा सम्मानलाई एउटै सूत्रमा जोड्ने प्रयास गरेको छ।