काठमाडौं । अपाङ्गता भएका व्यक्तिहरूको सशक्तीकरण तथा राज्यबाट उपलब्ध सेवा–सुविधामा पहुँच अभिवृद्धि गर्ने उद्देश्यले बूढानीलकण्ठ नगरपालिकाको सभाहलमा एकदिने अन्तरक्रिया कार्यक्रम सम्पन्न भएको छ।

नेपाल सरकारको महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षा मन्त्रालयको आयोजना र राष्ट्रिय अपाङ्ग महासंघ नेपालको सहकार्यमा आयोजित कार्यक्रममा अपाङ्गता भएका व्यक्तिहरूले भोगिरहेका समस्या तथा उनीहरूको अधिकार, सेवा–सुविधा र पहुँचका विषयमा छलफल गरिएको थियो।

कार्यक्रममा अपाङ्गता भएका व्यक्तिहरूको सहज आवागमनका लागि पहुँचयुक्त संरचना निर्माण, अपाङ्गता परिचयपत्र वितरण, सामाजिक सुरक्षा भत्ता, शिक्षा, स्वास्थ्य तथा रोजगारीमा पहुँच सुनिश्चित गर्ने विषयलाई प्राथमिकताका साथ उठाइएको थियो।

कार्यक्रममा नगरपालिकाका जनप्रतिनिधि, कर्मचारी, अपाङ्गता भएका व्यक्ति, अभिभावक तथा सरोकारवाला संघसंस्थाका प्रतिनिधिहरूको सहभागिता रहेको थियो। सहभागीहरूले अपाङ्गता भएका व्यक्तिहरूले दैनिक जीवनमा भोग्नुपरेका समस्या पहिचान गरी सेवा प्रवाहलाई सहज, समावेशी र प्रभावकारी बनाउनुपर्नेमा जोड दिएका थिए।

अपाङ्गता भएका व्यक्तिहरूको अधिकार सुनिश्चित गर्न स्थानीय सरकार, सम्बन्धित सरकारी निकाय तथा सरोकारवाला संघसंस्थाबीच प्रभावकारी समन्वय र सहकार्य आवश्यक रहेको कार्यक्रममा औँल्याइएको थियो। सेवा–सुविधामा पहुँच बढाउन नीतिगत व्यवस्था प्रभावकारी रूपमा कार्यान्वयन गर्नुपर्ने तथा अपाङ्गतामैत्री भौतिक संरचना र सेवाको विकास गर्नुपर्ने विषयमा समेत छलफल भएको थियो।

कार्यक्रममा सहभागी सरोकारवालाहरूले अपाङ्गता भएका व्यक्तिहरूको सशक्तीकरण, अधिकार संरक्षण तथा सेवा–सुविधामा सहज पहुँच सुनिश्चित गर्न आगामी दिनमा संयुक्त रूपमा काम गर्ने प्रतिबद्धता व्यक्त गरेका थिए।

अपाङ्गता भएका व्यक्तिहरूलाई सम्मानजनक, आत्मनिर्भर र समान अवसरसहितको जीवनयापन गर्न सहयोग पुर्‍याउने उद्देश्यले आयोजित कार्यक्रमले स्थानीय तहमा समावेशी सेवा प्रवाह र अधिकारमुखी पहललाई थप प्रभावकारी बनाउन सहयोग पुग्ने अपेक्षा गरिएको छ।