बुढानीलकण्ठ। बुढानीलकण्ठ नगरपालिका वडा नं. ३ को नवनिर्मित प्रशासनिक भवनको समुद्घाटन सम्पन्न भएको छ। नगरप्रमुख मिठाराम अधिकारीले रिबन काटेर भवनको औपचारिक उद्घाटन गर्नुभएको हो।

उद्घाटन कार्यक्रममा नगर उपप्रमुख अनिता लामा, प्रमुख प्रशासकीय अधिकृत अजय बर्तौला, नगर प्रवक्ता नवराज भट्टराई, वडा नं. ३ का अध्यक्ष आकाश धिताल तथा वडा सदस्यहरू विकास तामाङ, बालमाया श्रेष्ठ, विक्रम राज श्रेष्ठ र सुशिला रम्तेललगायत जनप्रतिनिधिहरूको उपस्थिति रहेको थियो।

कार्यक्रममा प्रमुख प्रशासकीय अधिकृत अजय बर्तौलाले नयाँ प्रशासनिक भवनले वडा कार्यालयको दैनिक कार्यसम्पादनलाई व्यवस्थित बनाउन र नागरिकलाई सहज रूपमा सेवा उपलब्ध गराउन सहयोग पुग्ने विश्वास व्यक्त गर्नुभयो। उहाँले भौतिक पूर्वाधारको विकाससँगै सेवा प्रवाहलाई प्रभावकारी, पारदर्शी र नागरिकमैत्री बनाउनुपर्नेमा जोड दिनुभयो।

नगरप्रमुख मिठाराम अधिकारीले नवनिर्मित भवनबाट वडावासीलाई प्रदान गरिने सेवा थप सहज र व्यवस्थित हुने विश्वास व्यक्त गर्नुभयो। नयाँ भवनलाई नागरिकले सहज रूपमा सेवा प्राप्त गर्ने केन्द्रका रूपमा विकास गर्दै सार्वजनिक सेवाको गुणस्तर अभिवृद्धि गर्नुपर्ने उहाँको धारणा रहेको थियो।

वडा नं. ३ का अध्यक्ष आकाश धितालले नयाँ प्रशासनिक भवनबाट वडाको कामकाज सञ्चालन गर्न सहज हुने तथा सेवाग्राहीलाई सेवा लिन थप सुविधा पुग्ने अपेक्षा गरिएको बताउनुभयो। उहाँले नागरिकलाई छिटो, छरितो र प्रभावकारी सेवा उपलब्ध गराउन वडा कार्यालय प्रतिबद्ध रहने धारणा व्यक्त गर्नुभयो।

नवनिर्मित भवनमा आवश्यक प्रशासनिक सुविधा र व्यवस्थित कार्यस्थल उपलब्ध हुने भएकाले सेवाग्राहीलाई सेवा लिन सहज हुने तथा वडा कार्यालयको दैनिक कामकाज थप प्रभावकारी बन्ने अपेक्षा गरिएको छ।

स्थानीय तहमा नागरिकसँग प्रत्यक्ष जोडिएको वडा कार्यालयले नयाँ भवनको प्रभावकारी उपयोग गर्दै सेवा प्रवाहको गुणस्तर, पारदर्शिता र नागरिकमैत्री कार्यसम्पादनमा ध्यान दिन सके यसको वास्तविक उपलब्धि वडावासीले अनुभूति गर्न पाउनेछन्।