काठमाडौं । नेपाली कांग्रेस काठमाडौंकी सक्रिय जिल्ला सदस्य चन्द्रज्योति खतिवडा (चन्दा) ले नेपाली कांग्रेसको जारी अधिवेशनअन्तर्गत काठमाडौं क्षेत्र नं. २ प्रदेश ‘क’को प्रदेश सभापति पदमा आफ्नो दाबी प्रस्तुत गरेकी छन्।

करिब २५ वर्षदेखि नेपाली कांग्रेसको राजनीतिमा निरन्तर सक्रिय रहँदै आएकी खतिवडाले पार्टी संगठनमा आफ्नो लामो अनुभवसँगै बदलिँदो कांग्रेस र नयाँ पुस्ताको राजनीतिक अपेक्षालाई जोडेर आफ्नो उम्मेदवारी अघि सारेकी हुन्।

पार्टीभित्र महिला नेतृत्वलाई थप स्थापित गर्ने, युवापुस्तालाई संगठनको मूलधारमा जोड्ने र अनुभवी पुस्ताको योगदानलाई सम्मान गर्दै नयाँ पुस्तासँग कांग्रेसको सम्बन्ध थप बलियो बनाउने उद्देश्यसहित आफू प्रदेश महिला सभापतिको दौडमा आएको खतिवडाले बताएकी छन्।

“करिब २५ वर्षदेखि कांग्रेसको राजनीतिमा निरन्तर सक्रिय छु। यो अवधिमा पार्टीका विभिन्न गतिविधि र संगठन निर्माणमा आफ्नो ठाउँबाट योगदान गर्दै आएकी छु। अहिले कांग्रेस बदलिँदो परिस्थितिसँगै नयाँ पुस्ताको भावना र अपेक्षालाई सम्बोधन गर्ने चरणमा छ। त्यसैले काठमाडौं क्षेत्र नं. २ प्रदेश ‘क’को प्रदेश महिला सभापतिमा मेरो दाबी हो,” खतिवडाले भनिन्।

उनले कांग्रेसमा महिलाको सहभागिता मात्र नभई निर्णायक नेतृत्व आवश्यक रहेको बताइन्। महिलालाई नेतृत्वमा अवसर दिँदा पार्टी संगठन अझ समावेशी, गतिशील र प्रभावकारी बन्ने उनको भनाइ छ।

“महिलालाई राजनीतिमा अगाडि बढाउन कांग्रेसले अझै धेरै अवसर दिनुपर्छ। महिला केवल कार्यक्रममा सहभागी हुने होइन, संगठनको नेतृत्व गर्ने अवस्थामा पुग्नुपर्छ। अबको कांग्रेसले महिलाको क्षमता र योगदानलाई नेतृत्वमा रूपान्तरण गर्नुपर्छ,” खतिवडाले भनिन्।

खतिवडा पछिल्लो समय कांग्रेसभित्र देखिएको पुस्तान्तरण र नयाँ राजनीतिक सोचको बहससँगै सक्रिय रहँदै आएकी छन्। उनी सभापति गगनकुमार थापाको नेतृत्वमा अघि बढिरहेको नयाँ राजनीतिक धारको पक्षमा उभिँदै आएकी नेतृका रूपमा पनि परिचित छन्।

उनको उम्मेदवारीलाई काठमाडौं–२ प्रदेश ‘क’मा महिला नेतृत्वलाई थप सक्रिय र प्रभावकारी बनाउने प्रयासका रूपमा लिइएको छ। लामो समयदेखि पार्टी संगठनमा सक्रिय रहेकी खतिवडालाई महिला, युवा तथा स्थानीय तहमा कांग्रेसको संगठनसँग जोडिएका विभिन्न व्यक्तिहरूबाट सकारात्मक समर्थन प्राप्त भइरहेको उनका समर्थकहरूको भनाइ छ।

“चन्द्रज्योति खतिवडा लामो समयदेखि कांग्रेसको राजनीतिमा सक्रिय हुनुहुन्छ। संगठनलाई नजिकबाट बुझ्नुभएको छ। महिला र नयाँ पुस्तासँग पनि उहाँको राम्रो सम्बन्ध छ। अहिलेको आवश्यकता अनुभव र नयाँ सोचलाई सँगसँगै लिएर अघि बढ्ने नेतृत्व हो। त्यसैले उहाँको दाबीलाई सकारात्मक रूपमा हेरेका छौँ,” एक कांग्रेस नेताले बताए।

अर्का एक स्थानीय कांग्रेस कार्यकर्ताले भने, “महिलालाई नेतृत्वमा ल्याउने कुरा अहिलेको कांग्रेसको महत्वपूर्ण विषय हो। चन्दा खतिवडाले लामो समय संगठनमा काम गर्नुभएको छ। उहाँको उम्मेदवारीले महिलाको नेतृत्व विकासमा सकारात्मक सन्देश दिन सक्छ।”

खतिवडाले आफू निर्वाचित भएमा प्रदेश ‘क’मा कांग्रेसको महिला संगठनलाई थप व्यवस्थित बनाउने, युवा महिलालाई राजनीतिमा आकर्षित गर्ने, नियमित राजनीतिक प्रशिक्षण तथा अन्तरक्रिया सञ्चालन गर्ने र स्थानीयस्तरका सामाजिक विषयमा कांग्रेसका महिला कार्यकर्ताको सक्रियता बढाउने योजना अघि सारेकी छन्।

उनले कांग्रेसलाई अब केवल निर्वाचनको समयमा मात्र सक्रिय हुने संगठन नभई जनतासँग निरन्तर जोडिने राजनीतिक संस्था बनाउनुपर्नेमा जोड दिइन्।

“अबको कांग्रेस जनताको घरदैलोमा निरन्तर पुग्नुपर्छ। युवाको आवाज सुन्नुपर्छ, महिलालाई नेतृत्व दिनुपर्छ र पार्टीभित्र सबैलाई सम्मानजनक स्थान दिनुपर्छ। अनुभवी नेताहरूको मार्गदर्शन र नयाँ पुस्ताको ऊर्जालाई जोडेर अघि बढ्न सके कांग्रेस अझ बलियो बन्न सक्छ,” खतिवडाले भनिन्।

काठमाडौं क्षेत्र नं. २ प्रदेश ‘क’को प्रदेश  सभापति पदमा खतिवडाको दाबीले कांग्रेसभित्र महिला नेतृत्व, पुस्तान्तरण र नयाँ राजनीतिक शैलीबारेको बहसलाई थप चर्चामा ल्याएको छ।

करिब २५ वर्षको राजनीतिक अनुभव बोकेकी खतिवडाले आफूलाई कुनै एउटा समूह वा सीमित घेराको मात्र उम्मेदवार नभई संगठनमा सक्रिय सबै महिला, युवा तथा कांग्रेसजनको साझा भावनालाई प्रतिनिधित्व गर्ने उम्मेदवारका रूपमा अघि सार्दै आएकी छन्।

“मेरो उम्मेदवारी व्यक्तिगत पदका लागि मात्र होइन, महिलाको नेतृत्व स्थापित गर्न र नयाँ पुस्तालाई कांग्रेसको नेतृत्वसँग जोड्नका लागि हो। सबैको साथ, सुझाव र सहयोग लिएर अघि बढ्ने मेरो प्रतिबद्धता छ,” खतिवडाले भनिन्।