टोखा । टोखा नगरपालिकामा सूचीकृत मेलमिलापकर्ताहरूको व्यावसायिक क्षमता अभिवृद्धि गर्ने उद्देश्यले आयोजित पुनर्ताजगी तालिम सम्पन्न भएको छ। स्थानीय तहमा हुने विभिन्न प्रकारका विवादहरूको समाधान प्रक्रियालाई थप प्रभावकारी, सहज र विश्वसनीय बनाउने लक्ष्यसहित नगरपालिकाले उक्त तालिम सञ्चालन गरेको हो।

तालिममा सहभागी मेलमिलापकर्ताहरूले मेलमिलापसम्बन्धी कानुनी व्यवस्था, व्यवहारिक अभ्यास, विवाद व्यवस्थापनका सीप तथा कार्यानुभव आदानप्रदान गरेका थिए। साथै स्थानीय समुदायमा देखिने विभिन्न प्रकृतिका विवादहरूलाई सौहार्दपूर्ण ढंगले समाधान गर्ने उपाय तथा प्रक्रियाबारे विस्तृत छलफल गरिएको थियो।

विशेष समारोहबीच सम्पन्न कार्यक्रममा टोखा नगरपालिकाका नगरप्रमुख, जनप्रतिनिधिहरू, न्यायिक समितिका पदाधिकारी तथा कानुन र न्याय क्षेत्रसँग सम्बन्धित विभिन्न व्यक्तित्वहरूको सहभागिता रहेको थियो। वक्ताहरूले समुदायमा शान्ति, सद्भाव, सामाजिक एकता तथा आपसी विश्वास कायम गर्न मेलमिलापकर्ताहरूको भूमिका अत्यन्त महत्वपूर्ण रहेको बताए।

उनीहरूले अदालतसम्म पुग्नुअघि नै स्थानीय स्तरमा विवाद समाधान गर्न सकिए नागरिकहरूको समय, श्रम र आर्थिक स्रोतको बचत हुने तथा न्यायमा सहज पहुँच स्थापित हुने धारणा व्यक्त गरे। साथै स्थानीय न्याय प्रणालीलाई प्रभावकारी बनाउन दक्ष र जिम्मेवार मेलमिलापकर्ताको आवश्यकता रहेकोमा जोड दिएका थिए।

कार्यक्रममा मेलमिलापकर्ताहरूका साथै करिब ४० जना स्थानीय नागरिकहरूको समेत सक्रिय सहभागिता रहेको थियो। नागरिकहरूको सहभागिताले मेलमिलाप प्रक्रियाको महत्व, यसको कानुनी आधार तथा स्थानीय न्याय प्रणालीप्रति जनचेतना अभिवृद्धि गर्न सकारात्मक योगदान पुगेको आयोजकले जनाएको छ।

टोखा नगरपालिकाले आगामी दिनमा पनि यस्ता क्षमता विकास तथा दक्षता अभिवृद्धिसम्बन्धी कार्यक्रमलाई निरन्तरता दिँदै स्थानीय न्यायिक समितिलाई थप सशक्त, प्रभावकारी र नागरिकमैत्री बनाउने प्रतिबद्धता व्यक्त गरेको छ।