काठमाडौं । लगातार भइरहेको वर्षाका कारण बाढी, पहिरो, डुबान तथा अन्य प्राकृतिक विपद्को जोखिम बढ्न सक्ने भन्दै बुढानीलकण्ठ नगरपालिका वडा नं. १ का वडा अध्यक्ष सुरेन्द्र लामाले वडावासीलाई विशेष सतर्कता अपनाउन आग्रह गरेका छन्।

जल तथा मौसम विज्ञान विभागले असोज ८ गतेदेखि केही दिन लगातार भारी वर्षा हुनसक्ने पूर्वानुमान सार्वजनिक गरेपछि वडा नं. १ कार्यालयले सम्भावित जोखिम न्यूनीकरणका लागि नागरिकलाई सचेत रहन आग्रह गरेको हो।

अध्यक्ष लामाले वर्षाको समयमा जोखिमयुक्त स्थानमा अनावश्यक आवतजावत नगर्न, नदी तथा खोलाको आसपास नजान र अत्यावश्यक कामबाहेक यात्रा नगर्न वडावासीलाई अनुरोध गरेका छन्।

“वर्षा कति बेला ठूलो विपद्मा परिणत हुन्छ भन्ने निश्चित हुँदैन। त्यसैले जोखिम देखिएपछि मात्रै होइन, जोखिम आउनुअघि नै हामी सबै सचेत हुनुपर्छ। आफ्नो परिवार र समुदायको सुरक्षाका लागि सबैले सावधानी अपनाउन आवश्यक छ,” अध्यक्ष लामाले भने।

उनले विशेषगरी खोला तथा नदी आसपास, भिरालो जमिन, पहिरोको सम्भावना भएका क्षेत्र र कमजोर संरचना भएका स्थानमा बसोबास गर्ने नागरिकले थप सावधानी अपनाउनुपर्ने बताए।

अध्यक्ष लामाका अनुसार विपद् व्यवस्थापनमा वडा कार्यालयको मात्र प्रयास पर्याप्त हुँदैन। स्थानीय नागरिक, टोल विकास संस्था, सुरक्षा निकाय, जनप्रतिनिधि तथा सम्बन्धित निकायबीचको समन्वयले मात्रै सम्भावित क्षति न्यूनीकरण गर्न सकिन्छ।

“विपद् व्यवस्थापन सरकार वा वडा कार्यालयको मात्रै जिम्मेवारी होइन। हरेक नागरिक सचेत र जिम्मेवार बन्न सके जोखिम धेरै हदसम्म कम गर्न सकिन्छ। टोल–टोलमा सम्भावित जोखिमबारे जानकारी आदानप्रदान गरौँ र समस्या देखिए तत्काल सम्बन्धित निकायलाई खबर गरौँ,” लामाले भने।

वडा कार्यालयले वडाभित्रका टोल तथा बस्तीमा सम्भावित जोखिमको अवस्थाबारे जानकारी राख्न, घरपरिवारमा आवश्यक पूर्वतयारी गर्न तथा मौसमसम्बन्धी आधिकारिक सूचना नियमित रूपमा हेर्नसमेत आग्रह गरेको छ।

त्यस्तै बालबालिका, ज्येष्ठ नागरिक तथा अशक्त व्यक्तिहरूको सुरक्षामा विशेष ध्यान दिन र वर्षाका बेला उनीहरूलाई जोखिमयुक्त स्थानमा जान नदिन परिवारका सदस्यलाई अनुरोध गरिएको छ।

अध्यक्ष लामाले आकस्मिक अवस्था सिर्जना भएमा स्थानीय जनप्रतिनिधि तथा सुरक्षा निकायलाई तत्काल जानकारी गराउन आग्रह गर्दै नागरिकको सुरक्षालाई पहिलो प्राथमिकतामा राखेर वडा कार्यालय आवश्यक समन्वयमा रहने बताएका छन्।

“हामी सबै मिलेर सावधानी अपनायौँ भने सम्भावित क्षति घटाउन सक्छौँ। अहिलेको अवस्थामा हतारभन्दा सावधानी महत्वपूर्ण छ। मौसम सामान्य नहुँदासम्म सबै वडावासी सुरक्षित स्थानमा रहनुहोस् र आवश्यक सतर्कता अपनाउनुहोस्,” अध्यक्ष लामाको अपिल छ।

बुढानीलकण्ठ–१ मा वर्षाका कारण हुन सक्ने सम्भावित जोखिमलाई ध्यानमा राख्दै वडा कार्यालयले नागरिकस्तरमै पूर्वसतर्कता र सूचना आदानप्रदानलाई प्राथमिकता दिएको छ। अध्यक्ष लामाले वडावासीलाई ‘सचेत नागरिक, सुरक्षित वडा’को भावनाका साथ सम्भावित विपद्को सामना गर्न एकजुट हुन आग्रह गरेका छन्।