काठमाडौं। वडादशैंमा घर फर्किने यात्रुहरूका लागि सरकारले आज (शुक्रबार) देखि लामो दूरीका सवारीसाधनको अग्रिम टिकट बुकिङ खुला गरेको छ। टिकट लिन सर्वसाधारण बिहीबार रातिदेखि नै काठमाडौंको नयाँ बसपार्कस्थित टिकट काउन्टर अगाडि लाइनमा बसेका छन्।

यातायात व्यवस्था विभाग, नेपाल प्रहरी, यातायात व्यवसायी तथा मजदुर संगठनका प्रतिनिधिहरूबीच असोज २० गते भएको बैठकले असोज २३ गतेदेखि अग्रिम टिकट बुकिङ सुरु गर्ने निर्णय गरेको थियो।

विशेषगरी सुदूरपश्चिम, कर्णाली तथा मध्यपश्चिमका दुर्गम जिल्लामा जाने यात्रुहरू बिहीबार राति ९ बजेदेखि नै टिकट काउन्टर अगाडि लाइनमा बसेका हुन्।

नयाँ बसपार्क सञ्चालन गर्दै आएको लोत्से बहुउद्देश्यीय प्रालिका महाप्रबन्धक पंकज मल्लका अनुसार यात्रुको चापलाई ध्यानमा राख्दै काउन्टर क्षेत्रमा थप १५ वटा टिकट काउन्टर स्थापना गरिएको छ। भीडभाड व्यवस्थापन र यात्रुको सुरक्षाका लागि सुरक्षाकर्मीको उपस्थिति बढाइएको छ भने सम्भावित ठगी नियन्त्रण गर्न सादा पोसाकका प्रहरी टोलीसमेत परिचालन गरिएको छ।

यसपटक काठमाडौं उपत्यकाबाट करिब १५ देखि २० लाख यात्रु आफ्नो जन्मथलो फर्किने अनुमान गरिएको छ। यात्रुको चाप बढ्ने भएकाले सम्भव भएसम्म अनलाइन टिकट बुकिङ प्रणाली प्रयोग गर्न सम्बन्धित निकायले सुझाव दिएका छन्।

यात्राका क्रममा भाडा ठगीबाट बच्न यातायात व्यवस्था विभागले तोकेको आधिकारिक भाडादरअनुसार मात्रै भुक्तानी गर्नुपर्नेछ। साथै, काउन्टरका कर्मचारीको परिचयपत्र जाँच गरी आधिकारिक छापसहितको टिकट लिन यात्रुहरूलाई आग्रह गरिएको छ।

यात्रुको सहजताका लागि नयाँ बसपार्क, कलंकी, कोटेश्वर र जडीबुटीलगायतका प्रमुख नाकामा नेपाल प्रहरी तथा यातायात व्यवस्था विभागले ‘यात्रु सहायता कक्ष’ सञ्चालनमा ल्याएका छन्। टिकट नपाएमा, तोकिएकोभन्दा बढी भाडा मागेमा वा अन्य कुनै समस्या परेमा यात्रुहरूले सहायता कक्षमा सम्पर्क गर्न वा प्रहरीको १०० नम्बरमा फोन गर्न सक्नेछन्।