काठमाडौं । चलचित्र निर्देशक निश्चल बस्नेत ले ‘जेनजी आन्दोलन’ का क्रममा भएका घटनाको अनुसन्धान आफ्नै नामबाट सुरु गर्न आग्रह गरेका छन्। राष्ट्रिय मानवअधिकार आयोग ले सार्वजनिक गरेको छानबिन प्रतिवेदनमा आफ्नो नाम पनि अनुसन्धानका लागि सिफारिस भएपछि उनले यस्तो प्रतिक्रिया दिएका हुन्।

गत भदौमा भएको उक्त आन्दोलनमा प्रदर्शन भड्काउन बल पुर्‍याएको भन्दै आयोगले बस्नेतसहित विभिन्न अभियन्ताहरूमाथि थप अनुसन्धान गर्न सरकारलाई सिफारिस गरेको थियो। प्रतिवेदन सार्वजनिक भएलगत्तै सामाजिक सञ्जालमार्फत आफ्नो धारणा राख्दै निर्देशक बस्नेतले निष्पक्ष छानबिन गरी सत्यतथ्य बाहिर ल्याउन चुनौती दिएका छन्।

“मानवअधिकार आयोगको प्रतिवेदनमा धेरै नामहरूमध्ये मेरो पनि नाम रहेछ। कृपया अनुसन्धानको सुरुआत चाहिँ मैबाट गरिदिनुहोला। दूधको दूध पानीको पानी छुट्याउनु पर्‍यो,” बस्नेतले सामाजिक सञ्जालमा लेखेका छन्।

आयोगले बुधबार सरकारलाई बुझाएको प्रतिवेदनमा तत्कालीन प्रधानमन्त्री, मन्त्रीहरू तथा सुरक्षा निकायका उच्च अधिकारीहरूका साथै आन्दोलनअघि र आन्दोलनपश्चात् सामाजिक सञ्जाल तथा सार्वजनिक मञ्चहरूमा अभिव्यक्ति दिने विभिन्न अभियन्ता, कलाकार तथा सामाजिक व्यक्तित्वहरूलाई अनुसन्धानको दायरामा ल्याउन सिफारिस गरेको छ।

उक्त सूचीमा निश्चल बस्नेत सँगै भिक्टर पौडेललगायत अन्य व्यक्तिहरूको नाम पनि समावेश गरिएको छ। आयोगले ती व्यक्तिहरूका अभिव्यक्तिले प्रदर्शनकारीलाई उक्साउने वा उत्तेजित पार्ने भूमिका खेले/नखेलेको विषयमा सूक्ष्म अनुसन्धान गर्न सरकारलाई सुझाव दिएको छ।