काठमाडौँ ।  तेहरानमा सम्भावित अमेरिकी सैन्य कारबाहीको आशङ्काबीच भारत सरकारले इरानमा रहेका आफ्ना नागरिकलाई देश छोड्न औपचारिक सल्लाह दिएको छ। क्षेत्रीय सुरक्षा अवस्था जटिल बन्दै गएको मूल्याङ्कन गर्दै भारतको विदेश मन्त्रालयले सतर्कता अपनाउन र उपलब्ध उडानमार्फत स्वदेश फर्किन आग्रह गरेको हो।

Embassy of India, Tehran ले सामाजिक सञ्जालमार्फत जारी गरेको सूचनामा इरानमा विकसित अवस्थालाई ध्यानमा राख्दै त्यहाँ रहेका भारतीय नागरिकलाई व्यापारिक उडानसहित उपलब्ध यातायातका माध्यम प्रयोग गरी इरान छोड्न सल्लाह दिइएको जनाएको छ। साथै विरोध–प्रदर्शन हुने क्षेत्रबाट टाढा रहन, दूतावाससँग नियमित सम्पर्कमा रहन र स्थानीय सञ्चारमाध्यमबाट अद्यावधिक सूचना लिइरहन आग्रह गरिएको छ।

Ministry of External Affairs का अनुसार इरानमा करिब १० हजार भारतीय नागरिक बसोबास गर्दै आएका छन्। हालको अस्थिर अवस्थालाई ध्यानमा राख्दै उनीहरूको सुरक्षालाई प्राथमिकता दिइएको सरकारी धारणा छ।

यो चेतावनी भारतीय प्रधानमन्त्री नरेन्द्र मोदी को तय भएको इजरायल भ्रमणअघि सार्वजनिक भएको हो। इजरायली प्रधानमन्त्री बेन्जामिन नेतान्याहु ले उक्त भ्रमणले ‘कट्टरपन्थी’ चुनौतीहरूको सामना गर्न नयाँ सहकार्य सुदृढ गर्ने अपेक्षा व्यक्त गरेका छन्।

मोदीले सामाजिक सञ्जालमार्फत इजरायलसँगको दीर्घकालीन मित्रता विश्वास, नवीनता र शान्ति तथा प्रगतिप्रतिको साझा प्रतिबद्धतामा आधारित रहेको उल्लेख गरेका छन्।

नयाँदिल्लीले रक्षा, कृषि, प्रविधि र सुरक्षाजस्ता क्षेत्रमा इजरायलसँग सहकार्य विस्तार गर्दै आएको छ। साथै भारतले इरान र खाडी राष्ट्रहरूसँग पनि रणनीतिक सम्बन्ध कायम राखेको छ। विशेषगरी चाबहार बन्दरगाह विकासमा भारतको संलग्नता अफगानिस्तानसम्म व्यापारिक पहुँच विस्तार गर्ने दीर्घकालीन योजनासँग जोडिएको छ।