काठमाडौं । इरानले अमेरिकाले लगाएको नाकाबन्दी तथा आर्थिक प्रतिबन्ध हटाए अत्यधिक प्रवर्धित युरेनियम भण्डारसम्बन्धी सम्झौतामा जान तयार रहेको जनाएको छ।

इरानी उपविदेशमन्त्री माजिद तख्त–रभाञ्चीले आइतबार BBCसँगको अन्तर्वार्तामा उक्त धारणा व्यक्त गरेका हुन्। उनले आगामी फेब्रुअरी ६ मा ओमानमा सुरु हुने आणविक वार्ता पुनः प्रारम्भ भएपछि अमेरिकासँग सम्झौतामा पुग्न इरान तयार रहेको बताए।

इरानले ४०० किलोभन्दा बढी ६० प्रतिशत संवर्धित युरेनियम भण्डारको भविष्य अनिश्चित रहेको उल्लेख गर्दै त्यसको जिम्मेवारी लिन रुससहित विभिन्न देशहरूले प्रस्ताव गरेको जनाएको छ। यद्यपि, इरानले हालसम्म ती प्रस्ताव अस्वीकार गर्दै आएको छ।

इरानी अधिकारीहरूले आफ्नो आणविक कार्यक्रम पूर्णतः नागरिक प्रयोजनका लागि मात्र भएको र कुनै सैन्य उद्देश्य नरहेको दाबी दोहोर्‍याएका छन्। तर पश्चिमी राष्ट्रहरूले भने इरानको आणविक गतिविधिलाई सम्भावित हतियार विकासको प्रयासका रूपमा हेर्दै आएका छन्।

यसबीच इजरायल र अमेरिकाले इरानी आणविक भण्डारमाथि आक्रमण गरेपछि परिस्थितिमा नयाँ जटिलता उत्पन्न भएको बताइएको छ। इरानले अमेरिकाले ‘इमानदारी’ देखाए वार्ताको मार्ग खुला हुने स्पष्ट पारेको छ।