धारा छोएको भन्दै दलितमाथि महोत्तरीमा कुटपिट

महोत्तरी । महोत्तरी जिल्लामा दलित परिवारमाथि धारा छोएको भन्दै कुटपिट भएको छ । महोत्तरी जिल्लाको बर्दिवास नगरपालिका वडा नं. ४ भब्सी हवलदार टोलमा गत बैशाख १५ गते स्थानीय रामबहादुर विश्वकर्माकी श्रीमती बुद्धमाया विश्वकर्मा र छोरी मनिषा विश्वकर्मामाथि धारा छोएकै नाममा कुटपिट भएको हो ।

सार्वजनिक धारा छोएको विषयमा विवाद हुँदा तल्लो जातिकी भएर पानी छुने भन्दै स्थानीय दिपक गिरीकी छोरी दिपीका गरी, श्रीमती कमला गिरी, उनकै आफन्त रामबाबु दाहाल लगायतकाले मरणासन्न हुनेगरी कुटपिट गरेका थिए ।

साही छुवाछुतको घटनालाई लिएर विश्वकर्मा समाज नेपालले खेद प्रकट गरेको छ । समाजका २ नं। प्रदेशका अध्यक्ष मीन रहपालले विज्ञप्ति मार्फत घटना निन्दनीय भएको उल्लेख गराएका छन् ।

घटनापछि मिलाउने नाममा वडा नं. ४ का वडाअध्यक्ष दिपवहादुर कार्की लागाएतकाले पीडितलाई अलमल्याएर राख्नाले पनि विश्वकर्मा समाज, नेपालको आपत्ती भएको विज्ञप्तिमा जनाइएको छ । घटनापछि प्रहरीले पीडकहरुलाई नियन्त्रण लिएपछि पनि पीडितहरुलाई विभिन्न तरिकाबाट मानसिक तनाव दिनेकार्य अझै रोकिएको छैन ।

उनीहरुमाथि मुद्दाफिर्ता लिन दिनहुँजसो विभिन्न खालका दबाबहरु समेत आईरहेको भन्दै उनीहरुको स्वतन्त्रपूर्वक बाँच पाउने अधिकारको प्रत्याभुति गराउँदै उनीहरुमाथि भईरहेको मानसिक तनाबका घटनाको निष्पक्ष रुपमा अनुगमन गरी घटनाका दोषीलाई कारबाही गर्न माग गरिएको विश्वकर्मा समाज, नेपाल प्रदेश समिति प्रदेश नं. २ का अध्यक्ष मीन रहपालले जारी गरेको विज्ञप्तिमा उल्लेख छ ।

सोमवार, जेष्ठ २८, २०७५ मा प्रकाशित

सम्बन्धित सामाग्री