काठमाडौं ।  मेगा बैंक नेपाल लिमिटेडले आर्थिक बर्ष २०७२/७३ को मुनाफाबाट आफ्ना शेयरधनीहरुलाई करिब १४ प्रतिशत शेयर लाभांश (बोनस) दिने भएको छ । भने ६५ प्रतिशत हकप्रद शेयर पारित गरेको छ ।मेगा बैंक नेपाल लिमिटेडको बिहीबार राजधानीमा सम्पन्न छैटौं साधारणसभाले उक्त कुरा पारित गरेको हो ।

बोनस शेयरका लागि लाग्ने कर समेत गरी १३.९५ प्रतिशत बोनस शेयर पारित गरेको हो । साधारण सभाले संचालक समितिले प्रस्ताव गरे बमोजिम १३.२५ प्रतिशत बोनस शेयर र त्यसको करका लागि प्रतिशेयर ०.७० प्रतिशत नगद लाभांश व्यवस्था गर्ने निर्णय गरेको छ ।

‘आर्थिक बर्ष २०७२/७३ मा बैंकले आर्जन गरेको सञ्चित मुनाफाबाट बैंकको हालको चुक्ता पुँजीको १३.२५ प्रतिशत अर्थात ५३ करोड १६ लाख बोनस शेयर तथा सोको लागि आवश्यक करको निमित्त हालको चुक्ता पुँजीको ०.७० प्रतिशत अर्थात २ करोड ८० लाख नगद लाभांश साभारण सभाले पारित गरेको छ ।’, साधारणसभापछि बैंकका अध्यक्ष भोजबहादुर शाहले भने – ‘संचालनको छोटो अवधिमै यति मुनाफा दिनसक्नुलाई हामीले उपलब्धिका रुपमा लिएका छौं । मैले अघिल्लो बर्ष १० प्रतिशत भन्दा बढी लाभांश दिने प्रतिबद्दता गरे बमोजिम यस बर्ष बैंकले १३.९५ प्रतिशत लाभांश वितरण गर्न सफल भएकोमा खुसी लागेको छु ।’

यसैगरी, साधारणसभाले ६५ प्रतिशत हकप्रद शेयर जारी गर्ने निर्णय समेत गरेको छ । यो निर्णयले करिब १ लाख ४० हजार शेयरधनी लाभान्वित हुनेछन् ।

‘सञ्चालनको ६ वर्षमै निर्माण तथा हासिल गरिएको यो आधार अत्यन्त उपलब्धिमुलक एवं उत्साहजनक रहेको बैंकको दावी छ । विपन्न वर्ग तथा लघुवित्त अन्तर्गत बैंकले करिब २१ हजार ग्राहकहरुलाई कर्जा प्रदान गरिसकेको छ ।’ अध्यक्ष शाहले –भने ‘देशका ६३ जिल्लामा छरिएका १ हजार २ सय १९ जना मध्यमवर्गीय संस्थापक शेयरधनीहरुले “हलोदेखि हाइड्रो” सम्मका ग्राहकहरुलाई लक्षित गरी“सम्पूर्ण नेपालीको बैंक” बनाउने उद्धेश्यले स्थापना गरेको हो । बैंकमा हाल सर्वसाधारण शेयरधनीहरुसहित करिब १ लाख ४० हजार शेयरधनीहरुको सहभागिताका साथै साविक पश्चिमाञ्चल डेभपलपमेण्ट बैंक लिमिटेडसंगको मर्जरबाट समेत बैंकको सञ्जाललाई थप व्यापक बनाएको उनले बताए ।

अत्याधुनिक प्रविधिको प्रयोग र क्षमतावान कर्मचारीका कारण मेगा बैंकले उत्साहमुलक प्रगति हासिल गरेको मेगा बैंकका प्रमुख कार्यकारी अधिकृत (सिइओ) शाहले बताए ।
देशका विभिन्न १० वटा स्थानहरुमा शाखा कार्यालयहरु विस्तार गर्नको निमित्त बैंकले नेपाल राष्ट्र बैंकबाट स्वीकृति प्राप्त गरिसकेको छ । शाखा स्थापनाको लागि आवश्यक कार्यहरु तालिका बमोजिम अघि बढिसकेका छन् । शाखा विस्तारपछि मेगा बैंकको सञ्जाल झन् सशक्त र व्यापक बन्ने विश्वास लिएको उनले बताए ।

मेगा बैंकले स्थापनाको पहिलो बर्षदेखि नै निरन्तर नाफा गर्दै आएको छ । २०७१/७२ मा बैंकले ३४ करोड ६२ लाख रुपैयाँ खूद मुनाफा आर्जन गर्न सफल भएकोमा २०७२÷७३ मा बढेर ५५ करोड १० लाख पुगेको थियो ।

सिइओ शाहका अनुसार, चालू आर्थिक वर्ष २०७३/७४ को दोस्रो त्रैमासिक अवधिसम्म बैंकको कूल निक्षेप ७ अर्ब ७७ करोडले वृद्धि भई ३८ अर्ब ५२ करोड रुपैंया पुगेको छ भने खुद कर्जा ६ अर्ब ६५ करोडले वृद्धि भई ३४ अर्ब १ करोड रुपैंया पुगेको छ । दोस्रो त्रैमासिकमै बैंकले ३७ करोड ९ लाख खूद मुनाफा आर्जन गरेको छ ।

मेगा बैंकका अहिले ३९ वटा शाखा कार्यालयहरु, १ एक्सटेन्सन काउण्टर, ४७ वटा एटिएम मेसिनहरु तथा ५८ वटा शाखारहित बैंकिङ्ग केन्द्रहरु रहेका छन् । यसैगरी, बैंकको आफ्नै विप्रेषण प्रविधि “मेगारेमिट” को देशभर १४ सय भन्दा बढी प्रतिनिधिहरु रहेका छन् भने अन्य आन्तरिक तथा अन्र्तराष्ट्रिय विपे्रषण सेवा सहकार्यको संख्या २० पुगेको छ । यसैगरी, बैंकको ग्राहक संख्या २ लाख २४ हजार पुगेको छ ।