सम्राट सिंह/
बझाङ २५ जेठ । विकट हिमाली जिल्ला बझाङको स्याडी गाविस ७ बित्थडमा अवस्थित कालिका बाल ज्योती प्राथमिक विद्यालय को भवन जिर्ण हुँदा पठनपाठनमा समस्या हुने गरेको छ । २०६६ सालमा स्थापना भएको उक्त विद्यालयमा हालसम्म भवन निर्माणको कोटा नपर्दा पठनपाठनमा समस्या भएको हो ।
भवन आवश्यक विद्यालयको पहिचान गरी जिल्ला शिक्षा कार्यालयले विद्यालय भवनका कोटा बितरण गर्नुको सट्टा कमिसन र राजनिति पहुँचका आधारमा बितरण गर्दा आफ्नो विद्यालयमा हालसम्म भवन निर्माण नपरेको पुर्व विद्यालय व्यवस्थापन समितिका अध्यक्ष गोपाल बोहोराले बताए ।
७४ छात्र र ६१ छात्रा गरी १ सय ३५ जना विद्यार्थी भएको उक्त विद्यालयमा टिनले छाएको टहरा मा विद्यार्थीहरु अध्ययन गरीरहेका छन ।
जिल्लाका राजनितिक दल तथा जिल्ला शिक्षा अधिकारीले भवन कोटा दिने आश्वासन मात्र दिने गरेको तर हाल सम्म सामान्य मर्मत पनि विद्यालयलाई सुविधा नदिएको स्थानिय बासिन्दाको गुनासो छ ।
जेठ १६ गते आएको हुरीले यस विद्यालयका जस्तापाताहरु उडाएपछि हाल सामान्य मर्मत गरी विद्यार्थीहरुलाई अध्यापन गराइदै छ ।
विद्यालय भवन को पटक पटक माग गर्दा पनि जिल्ला शिक्षा कार्यालयले सुनुवाई नगरेको कालिका बाल ज्योती प्राथमिक विद्यालयका प्रधानाध्यापक माधव प्रसाद पन्तले बताए । उनले भने जिल्ला शिक्षा कार्यालयबाट बितरण हुने विद्यालय भवन कोटा मा पार्टीका भागबण्डा हुँदा पहुच भएको विद्यालयहरुले मात्र भवनका कोटा पाउने गरेका छन ।
जिल्ला शिक्षा कार्यालयबाट १ जना मात्र शिक्षक दरबन्दी रहेको उक्त विद्यालयमा ३ जना निजि स्रोतबाट अध्यापन गराउँदै आएका छन ।
यता जिल्ला शिक्षा अधिकारी मदन थापाले विद्यालय अवस्था आफुले अनुगमन गरेको यसबर्ष भवनको लागि पहल गर्ने बताए ।