जाजरकोट , ९ असार । जाजरकोटको भगवती गाविसमा रहेको उपस्वास्थ्यचौकी एक महिनादेखि बन्द हँुदा स्वास्थ्य सेवा प्रभावित भएको छ । कर्णाली अञ्चलको डोल्पा जिल्लासँग जोडिएको यो गाविसमा जाजरकोट, रुकुम र डोल्पाका स्थानीय उपचारका लागि यहाँ आँउने गरेका छन् ।
एक महिनाअघि स्वास्थ्यचौकीमा ताला लगाएर कर्मचारीहरु लोकसेवा आयोगको परीक्षा दिन हिँडेपछि अहिले यहाँका नागरिक स्वास्थ्य सेवाबाट वञ्चित भएको स्थानीय मोहन बस्नेतको भनाइ छ । दिनमा १२ देखि २० जनाको सङ्ख्यामा बिरामी उपचारका लागि आउने गरे पनि स्वास्थ्य संस्था बन्द भएको कारण उपचार नगरेरै फर्कने गरेको उनले बताए ।
ग्रामीणस्तरमा कहिले स्वास्थ्यकर्मी नहुने त कहिले औषधि नहुँदा जनताले पीडाबाहेक अरू केही नपाएको गुनासो स्थानीय कालीबहादुर नेपालीको छ । स्वास्थ्यकर्मी नहुँदा असार ५ देखि ८ गते लगाउनुपर्ने नियमित खोपसमेत यहाँका एक वर्षमुनिका बालबालिकाले लगाउन पाएका छैनन् ।
राष्ट्रिय खबर
प्रतिक्रिया