पोखरा, २० जेठ  ।पोखराको मणिपाल शिक्षण अस्पतालमा उपचारको क्रममा सुत्केरी महिलाको ज्यान गएपछि तनाव बढेको छ ।
कास्कीको हेम्जाकी २७ वर्षकी कोपिला भण्डारी कार्कीको शल्यक्रिया गरेर बच्चा निकालेपछि, पुनः शल्यक्रिया गर्ने क्रममा ज्यान गएपछि, अस्पतालको लापरवाहीले ज्यान गएको भन्दै आफन्तहरु विरोधमा उत्रिएपछि तनाव बढेको हो ।
हेम्जाको रेडियो हेम्जामा कार्यरत कार्कीको सोमबारराती उपचारका क्रममा ज्यान गएको थियो । पहिलोपटकको शल्यक्रियापछि अत्यधिक रक्तश्राव भएपछि, चिकित्सकले प्लेटेलेट्स कम भएको भन्दै चार पोका रगत चढाएका थिए । स्वास्थ्यमा सुधार नआएपछि, दोश्रोपटक शल्यक्रिया गर्ने तयारी गर्दै गर्दा कार्कीको ज्यान गएको हो ।
कार्कीको निधन भएपछि आफन्तहरुले चिकित्सकको लापर्वाहीकै कारण सुत्केरीको ज्यान गएको भन्दै प्रदर्शन गरिरहेका छन् । आफन्त र पोखराका सञ्चारकर्मीहरुले घटनाको सत्यतथ्य छानविन र क्षतिपूर्ति दिनुपर्ने माग राखेका छन् । कार्कीको निधनपछि अचेत रहेका उहाँका श्रीमानको उपचार भैरहेको छ भने नवजात शिशुको अवस्था सामान्य रहेको छ ।